Улаанбаатар
“Элэг бүтэн Монгол” үндэсний хөтөлбөрийн хоёр дахь шатанд зориулж 21,9 сая төгрөг олгожээ
ОРОН НУТГИЙН МЭДЭЭ | ГОВЬ-АЛТАЙ
Говь-Алтай /МОНЦАМЭ/ “Элэг бүтэн Монгол” үндэсний хөтөлбөрийн хоёр дахь шатны үйл ажиллагааг Говь-Алтай аймагт хэрэгжүүлэхээр улсын төсвөөс 21,9 сая төгрөг олгосон байна. Энэхүү санхүүжилтыг 15-39 насны иргэдийг эрт илрүүлгийн үзлэгт хамруулахаар 12.199 хүний 42.6 мянган төгрөгний оношлуур, баталгаажуулах шинжилгээний зардалд зарцуулахаар оношлуур дагалдах хэрэгслийг сум, өрхийн эрүүл мэндийн төвүүдэд нийлүүлжээ.
Засгийн газрын 2017 оны дөрөвдүгээр сарын 12-ны өдрийн 112 дугаар тогтоолоор “Элэг бүтэн Монгол” үндэсний хөтөлбөрийн хоёр дахь шатны үйл ажиллагаанд энэ онд тус аймгийн 15-39 насны 12199, 65-аас дээш насны 1230, өмнө онд хамрагдаагүй 40-65 насны 5841 иргэнийг хамруулах юм.
Түүнчлэн хөтөлбөрийн хоёр дахь шатны үйл ажиллагааг хэрэгжүүлэх зорилгоор Улаанбаатар хотод зохион байгуулагдсан “Хепатитийн вирүсийн илрүүлэг шинжилгээ хийх арга зүйг эзэмшүүлэх” сургагч багшийн сургалтанд Эрүүл мэндийн газраас хоёр мэргэжилтэн, Нэгдсэн эмнэлгийн лабораторийн хоёр эмч, нэг лаборант хамрагдсан ба тэд энэхүү сургалтыг орон нутагтаа зохион байгуулж, сум, өрхийн эрүүл мэндийн төвийн эмч, лаборантуудыг мэргэжил арга зүйгээр ханган ажиллаж байгаа гэнэ.
“2017 онд элэгний “В” вирүс дарангуйлах эмчилгээнд 180 хүн хамрагдснаас 105 хүн эмчийн хяналтанд эмээ ууж байгаа бөгөөд “С" вирүс дарангуйлах эмчилгээнд 277 хүн хамрагдсанаас 162 хүн вирүсийн идэвхжилгүй болж эмчлэгдэн 115 хүн эмчилгээ хийлгэж байна” хэмээн тус аймгийн Эрүүл мэндийн газрын Халдварт өвчний асуудал хариуцсан мэргэжилтэн Э.Цэвэлмаа мэдээлэв.
Э.Нарангэрэл
