Улаанбаатар
Ерөнхийлөгч Х.Баттулга Хэлний бодлогын үндэсний зөвлөлийн гишүүдийг хүлээн авч уулзлаа
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол хэлний тухай хуулийн 21 дүгээр зүйлд заасны дагуу Монгол Улсын Ерөнхийлөгчийн дэргэд ажилладаг Хэлний бодлогын үндэсний зөвлөлийн шинэ бүрэлдэхүүн өнөөдөр Монгол Улсын Ерөнхийлөгч Х.Баттулгад бараалхаж, монгол хэл, бичиг үсгийг хэрэглэх, хамгаалах, хөгжүүлэх асуудлаар ярилцлаа.
Хэлний бодлогын үндэсний зөвлөлийн Ажлын албаны дарга Н.Нарангэрэлийн танилцуулснаар Хэлний бодлогын үндэсний зөвлөлийн өмнөх даргын тогтоолоор “Монгол хэлний зөв бичих дүрмийн толь” номыг бүтээж эхэлсэн нь хоёр жилийн хугацаанд үргэлжилж дууссан байна.
“Монгол хэлний зөв бичих дүрмийн толь” номыг бүтээхэд Хэлний бодлогын үндэсний зөвлөлийн одоогийн гишүүд мөн оролцсон бөгөөд нийт 20 гаруй эрдэмтнээс бүрдэх ажлын хэсэг ажиллаж, хэл шинжлэлийн академич, шинжлэх ухааны докторууд хувь нэмрээ оруулжээ. Монгол Улс нь 1983 оноос хойш Ц.Дамдинсүрэн, Б.Осор нарын “Монгол үсгийн дүрмийн толь”, 18 мянган үгтэй толь бичгийг хэрэглэж хэвшсэн юм.
Харин Хэлний бодлогын үндэсний зөвлөлөөс гарч буй Монгол хэлний зөв бичих дүрмийн толь” номд 37486 үг орсон бөгөөд 6000 орчим гадаад үгсээс шигшиж 1000 гадаад үгийг номонд оруулжээ. Энэ номыг хэвлэх эсэх асуудлыг хэлэлцэхээр Хэлний бодлогын үндэсний зөвлөлийн шинэ бүрэлдэхүүн өчигдөр анхны хуралдаанаа хийж, Монгол хэлний тухай хуульд зааснаар хэвлэх шийдвэрт хүрсэн байна.
Мөн ном хэвлэгдэн гарснаар 1941 оноос хойш гарч байгаа монгол хэлтэй холбоотой маргаан нэг тийш шийдэгдэж байгаа талаар Хэлний бодлогын үндэсний зөвлөлийн дарга, Ардын багш С.Дулам Монгол Улсын Ерөнхийлөгч Х.Баттулгад танилцуулсан юм. Номыг монгол хэл, уран зохиолын хичээл заадаг 9600 гаруй багш болон төрийн албан хаагчдад зургадугаар сарын 15-ны дотор үнэгүй тарааж өгөх юм байна.
Түүнчлэн уулзалтын үеэр монгол бичигт шилжих асуудал, үүнтэй холбоотойгоор монгол бичгийн юникод буюу олон улсын стандарт кодчиллын асуудлыг дэлгэрэнгүй ярилцав.
Хэлний бодлогын үндэсний зөвлөлийг шинэчлэн байгуулах тухай Монгол Улсын Ерөнхийлөгчийн зарлиг тавдугаар сарын 23-ны өдөр гарсан бөгөөд Хэлний бодлогын үндэсний зөвлөлийн гишүүдийг монгол хэл, утга зохиолын эрдэмтэн, хэвлэл мэдээлэл, боловсрол, соёл, шинжлэх ухааны салбарын мэргэжлийн төлөөллөөс сонгож зургаан жилийн хугацаатай томилохоор заасан Монгол хэлний тухай хуулийн шаардлагыг хангуулах зорилгоор Хэлний бодлогын үндэсний зөвлөлийг шинэчлэн байгуулахаар шийдвэрлэсэн юм.
Монгол Улсын Ерөнхийлөгч Х.Баттулгын зарлигын дагуу ХЭЛНИЙ БОДЛОГЫН ҮНДЭСНИЙ ЗӨВЛӨЛ-д ажиллаж байгаа гишүүд:
Зөвлөлийн дарга:
СУИС-ийн Профессорын багийн ахлагч, Хэл бичгийн шинжлэх ухааны доктор /D/ профессор С.Дулам
Монгол хэл, утга зохиол боловсрол, соёл, шинжлэх ухааны салбар төлөөлсөн гишүүд:
МУИС-ийн зөвлөх профессор, Хэл бичгийн шинжлэх ухааны доктор /Sc.D/, профессор М.Базаррагчаа
МУБИС-ийн Монгол судлалын төвийн эрхлэгч, Хэл бичгийн шинжлэх ухааны доктор /Sc.D/, профессор Ц.Өнөрбаян
МУБИС-ийн Сэтгүүлзүйн тэнхимийн эрхлэгч, Хэл бичгийн ухааны доктор /Ph.D/, Профессор Ж.Батбаатар
МУБИС-ийн Монгол судлалын сургуулийн багш, Хэл бичгийн ухааны доктор /Ph.D/ Л.Жумдаан
МУБИС-ийн Боловсролын сургуулийн Монгол хэл, нийгмийн ухааны тэнхмийн эрхлэгч, Хэл бичгийн ухааны доктор /Ph.D/ Г.Бямбацэрэн
Хэвлэл мэдээлэл, Шинжлэх ухааны салбар төлөөлсөн гишүүд:
Сэтгүүлч, орчуулагч Г.Аким
Мэдээллийн технологийн инженер Д.Моондой
Бүгд Найрамдах Словак Улсын ШУА-ийн Компьютерийн судалгааны хүрээлэнгийн секторын эрхлэгч, доктор /Ph.D/ Д.Сахиа
