Улаанбаатар
“Харанга” хамтлаг 35 жилийнхээ ойн тоглолтыг амьд хөгжмийн наадам болгоно
МОНГОЛЫН МЭДЭЭ | СОЁЛ УРЛАГ
Улаанбаатар, 2024 оны наймдугаар сарын 5 /МОНЦАМЭ/. Тэртээх 1989 онд ардчилал, зах зээлийн эдийн засагт шилжих эргэлтийн үед Монголын амьд хөгжмийн ертөнцөд өөрсдийн байр суурийг тунхаглан хүнд рок урсгалаар уран бүтээлээ туурвиж эхэлсэн “Харанга” хамтлагийн 35 жилийн ой энэ онд тохиож байна.
Монголын амьд хөгжмийн урлагийн түүхэнд тод мөртэй, баялаг түүхтэй, чансаатай уран бүтээлтэй, хамтлагийн гишүүн бүр нь зохиосон аялгуу, туурвисан бүтээлээ үнэлүүлэн гавьяатын тэмдгийг энгэртээ зүүж, хамтлагаараа Төрийн соёрхолт цол хүртсэн анхны бөгөөд цор ганц хамтлаг бол “Харанга” юм. Тэртээгээс өдгөө хүртэл 35 жил уран бүтээлээ тасралтгүй туурвисаар буй тус хамтлагийнхан энэ сарын 24-нд “Амьдрал” нэртэй амьд хөгжмийн наадмыг толилуулахад бэлэн болжээ.
Тэд зөвхөн өөрсдөө дуулахыг хүсээгүй учраас Монголын рок, поп урлагт хэдийн байр сууриа олсон хамтран зүтгэгчдээ тоглолтдоо урьснаа өнөөдөр болсон хэвлэлийн хурлын үеэр онцоллоо. “Амьдрал” тоглолтод алтан үеийн “Соёл-Эрдэнэ”, “Айзам”, “Чингис хаан”, “Хурд”, мөнгөн үеийн “Никитон”, Б.Сарантуяа, С.Наран, “Хар сарнай” тэргүүтэй 35 хамтлаг, дуучин уран бүтээлийнхээ дээжээс сонирхуулах нь ээ.
Тоглолтын талаар “Харанга” хамтлагийн гоцлол дуучин, Монгол Улсын гавьяат жүжигчин Х.Лхагвасүрэн, “35 жилийн ой маань суух эрх өгдөг юм байна. Ээж аав, эмэг өвгөд, эх орон, Монголын урлагийн бурхаддаа бүгдэд нь баярлалаа гэж хэлье. Тавуулаа эхлүүлээд тавуулаа 35 жил болно гэдэг хүний нэг насанд гайхамшигт зүйл байх гэж бодож байна. Мөчир бүтэн мод, өрх бүтэн айл байдаггүй гэсэн. Гэтэл бид сууж байгаа нь үнэхээр их хувь заяа, тэмдэглэхгүй байхын аргагүй юм” хэмээлээ.
1989 оны 12 дугаар сарын 26-нд Улсын Драмын Эрдмийн Театрт “Амьдрал” нэртэй анхны тоглолтоо хийж байсан тэд 35 жилийн ойн тоглолтоо ч алдарт
“Амьдрал” дуугаараа нэрлэжээ. Өнөөдрийг хүртэл тус хамтлаг 18 удаагийн бүрэн
хэмжээний тоглолт зохион байгуулсан байна. Хамгийн сүүлд хоёр жилийн өмнө фэнүүдтэйгээ
уулзсан бол энэ удаагийнх нь 19 дэх удаагийнх нь тоглолт болж буй юм. Төв цэнгэлдэх
хүрээлэнд анх удаа тоглолтоо зохион байгуулах тэд үүнээс өмнө реалити шоу цацаж,
шинэ уран бүтээлээс гадна хуучны дуунуудаасаа дүрсжүүлж олны хүртээл болгох
гэнэ.
