ДОРНОД: Тал нутгийн адууны арьс, сүүлээр хийсэн цүнх 2025 онд дэлхийн зах зээлд гарна

ОРОН НУТГИЙН МЭДЭЭ | ДОРНОД
167@montsame.mn
2023-09-13 15:03:39

Чойбалсан /МОНЦАМЭ/. Дэлхийн загварын ноён оргилуудын нэг, Францын HS компани тал нутгийн адууны арьс, сүүлээр цүнх, бусад төрлийн бүтээгдэхүүн үйлдвэрлэнэ.


Компанийн  цүнхний үйлдвэрлэлийн хэсгийнхэн өнгөрсөн сард Дорнод аймагт тав хоногийн хугацаанд ажиллаад буцжээ.

“Зүүн хойд Азийн байгаль орчин, ХАА-н судалгааны төв” ТББ, Францын HS компани сүүлийн гурван жилийн турш энэ тал дээр хамтран ажиллажээ. Судалгааны үр дүнд Дорнодын адууны сүүл нарийн, цүнх үйлдвэрлэхэд хамгийн тохиромжтой түүхий эд болно гэж үзжээ. Ийнхүү судалгааны ажлаа хийж, хоёр жилийн дараа гэхэд цүнх үйлдвэрлэн, дэлхийн зах зээлд нийлүүлэхээ мэдэгдсэн байна.


“Зүүн хойд Азийн байгаль орчин, ХАА-н судалгааны төв” ТББ-ын захирал Л.Лхагвасүрэн: “Эхний ээлжид адууны 2000 ширхэг арьс, 500 ширхэг сүүлийг HS компанид нийлүүлсэн” гэв.


Сонирхуулахад, Францын HS компани нь Гучи, Луивитоны дээгүүр эрэмбэлэгддэг, тансаг бүтээгдэхүүн үйлдвэрлэдэг аж. Нэг цүнхийг нэг л хүн гардан бүтээдгээрээ бусад алдартай брэндүүдээс ялгардаг. 

Холбоотой мэдээ