Улаанбаатар
Нийт 7 мянган га талбайг усалгаатай болгоно
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. ХХААХҮЯ, АХБ-ны санхүүжилтээр “Хүнсний ногооны үйлдвэрлэл ба усалгаатай хөдөө аж ахуй” төслийг 2020-2026 онд хэрэгжүүлж байна.
Төслийн хүрээнд 8 аймгийн 18 сумын орон нутгийн өмчийн,
эрдэм шинжилгээ, судалгааны байгууллагын 4 услалтын системийг шинэчлэн
сайжруулснаар нийт 7 мянган га талбайг усалгаатай тариалангийн эргэлтэд нэмж
оруулах юм.
Одоогоор Баян-Өлгий, Говь-Алтай, Завхан, Сэлэнгэ, Төв, Ховд, Хэнтий зэрэг 7 аймгийн 10 суманд нийт 3031 га талбайг услах хүчин чадалтай услалтын систем барьж байгуулахад 50 тэрбум төгрөгийн хөрөнгө оруулалт хийгээд байна. Энэ онд багтаан эхний ээлжийн 2-3 услалтын системийг ашиглалтад хүлээлгэн өгөхөөр төлөвлөснийг ХХААХҮЯ мэдээллээ.
Инженерийн хийцтэй услалтын системүүд байгуулснаар 3500
гаруй тариалан эрхлэгч өрх жилд дунджаар 8 мянга гаруй тонн хүнсний ногоо, 90
мянга гаруй тонн малын тэжээл үйлдвэрлэж, тэр хэрээр өрхийн орлого нэмэгдэх
боломж бүрдэнэ. Төслийн дүнд
усалгаатай тариалангийн хэмжээг одоогийн түвшнээс 10-12 хувиар нэмснээр уур амьсгалын өөрчлөлт,
хуурайшилт, дулаарлын нөхцөлд газар тариалангийн үйлдвэрлэлийг эрсдэлээс
хамгаалах, хүнсний тогтвортой байдлыг хангахад хувь нэмэр оруулах аж.
