Улаанбаатар
СҮХБААТАР: Хөрөнгө оруулалт, хөгжлийн чуулганыг тавдугаар сард зохион байгуулна
ОРОН НУТГИЙН МЭДЭЭ | СҮХБААТАР
Баруун-Урт /МОНЦАМЭ/. Сүхбаатар аймгийн хөрөнгө оруулалт хөгжлийн чуулган 5
дугаар сарын 19, 20-нд Баруун-Уртад болно. Монгол Улсын хэмжээнд үйл ажиллагаа
нь амжилттай явж буй томоохон ААНБ-уудыг чуулганд урилгаар оролцуулна.
Чуулганыг угтаж аймгийн удирдлагууд эхлээд сумд, ААНБ-уудад ажиллаж, иргэдийн санал хүсэлтийг сонсон, төрийн албан хаагч, иргэдтэйгээ зөвлөлдөх аж. Өөрөөр хэлбэл хүн бүрийн санал, оролцоотойгоор аймгийнхаа ирээдүйн хөгжлийг тодорхойлно. Эндээс гарсан санал санаачилгуудаа нэгтгээд чуулганаар хөрөнгө оруулагчдад танилцуулах юм.
Энэ талаар аймгийн Засаг дарга М.Идэрбат хэлэхдээ, 10 жилийн өмнө Сүхбаатар аймаг Улаанбаатар хотод хөрөнгө оруулалт, хөгжлийн чуулганаа анх хийсэн. Тухайн үед аймгийн 10 жилийн хөгжлийн дүр зургийг гаргаж байсан. Тэнд яригдаж байсан хөгжлийн төслүүд зарим нь хэрэгжиж, зарим нь одоо ч үргэлжилж байна.
Жишээлбэл, Баруун-Урт сумыг таван тойргийн замаар
хөгжүүлэх төлөвлөгөө өнгөрсөн онд бүрэн дууссан. Тэгвэл энэ удаагийн
чуулганаар 2033 он хүртэл буюу Сүхбаатар аймгийн дараагийн 10 жилийн хөгжлийн
концепцыг тодорхойлно. Мэдээж Монгол Улсын Засгийн газраас хэрэгжүүлж буй
бодлогын томоохон төслүүд болох Бичигт-Хөөтийн төмөр зам, газрын тосны хоолой,
Бичигт боомтын шинэчлэл зэрэг ажлууд тусдаа хийгдэнэ. Ингэж байж жинхэнэ
утгаараа Хөдөөгийн сэргэлт бий болж, Улаанбаатар хот болон бусад аймгаас
Сүхбаатар аймгийг зорин ирж суурьших иргэдэд амьдарч, ажиллах нөхцөлийг бүрдүүлэх
учиртай гэв.
