Австралид хүлэмжийн хийн ялгарлыг бууруулахыг чухалчилна

ДЭЛХИЙН МЭДЭЭ | УЛС ТӨР
khulan@montsame.gov.mn
2022-07-04 12:17:00

КАНБЕРРА. /AP/. Австралийн шинэ Засгийн газар уур амьсгалын өөрчлөлтийн асуудлуудад эн тэргүүний ач холбогдол өгч, парламентын анхны хуралдаанаар хүлэмжийн хийн ялгарлыг бууруулах, цахилгаан автомашины үнийг хямд болгох хуулийн төслүүдийг хэлэлцэхээр болжээ.


Тодруулбал, Австрали 2030 он гэхэд хүлэмжийн хийн ялгарлыг 2005 оны үеийнхээс 43 хувиар бууруулах үүрэг амлалт бүхий хуулийн төслийн талаар танилцуулна гэж Уур амьсгалын өөрчлөлт, эрчим хүчний асуудал эрхэлсэн сайд Крис Боуэн мэдээлсэн байна.


Мөн тансаг зэрэглэлийн автомашины босго үнэ болох 77 565 австрали.доллароос доош үнэтэй цахилгаан тээврийн хэрэгслийн импортын татварыг цуцлах хуулийн төслийн талаар хэлэлцэх ажээ. 


Одоогоор Австралид худалдаалагдаж буй автомашинуудын ердөө 1.5 хувь нь цахилгаан юм уу хос хөдөлгүүртэй байгаа бөгөөд улсын нийт хорт хийн ялгарлын ойролцоогоор 10 хувийг суудлын автомашинууд эзэлдэг байна.


Лейборист намын тэргүүлж буй Засгийн газрын тооцоолж буйгаар, 2030 он гэхэд Австралид худалдаалагдах шинэ автомашинуудын 89 хувийг цахилгаан тээврийн хэрэгслүүд эзлэх төлөвтэй байна. 

Холбоотой мэдээ