Улаанбаатар
Энэ сарын 23-наас эхлэн нийтийн тээврийн автобус хот хооронд зорчино
ОРОН НУТГИЙН МЭДЭЭ | СЭЛЭНГЭ
Сэлэнгэ/МОНЦАМЭ/. Сэлэнгэ аймгийн Онцгой комисс өнөөдөр хуралдаж дараах шийдвэрийг гаргалаа. Сэлэнгэ аймагт ирэх, буцах зорчих хөдөлгөөнд оролцож
байгаа иргэд, жолооч нар УОК-ын 2021 оны 5 дугаар сарын 19-ний өдрийн 46 дугаар
тушаалаар баталсан “Хот болон орон нутаг хооронд иргэдийн зорчих хөдөлгөөнийг
зохицуулах түр журам”-ыг мөрдлөг болгон ажиллана.
Ингэхдээ дархлаажуулалтын бүрэн тунд хамрагдаж, 14-өөс дээш хоносон хот хооронд, орон нутагт зорчигч тээврийн үйлчилгээ үзүүлдэг жолооч нар халдвар хамгааллын дэглэмийг баримтлан зорчих хөдөлгөөнд оролцож зорчигчдыг тээвэрлэнэ.
Мөн энэ сарын 23-ны өдрөөс эхлэн нийтийн тээврийн автобус Сүхбаатар-Улаанбаатар, Улаанбаатар-Сүхбаатар чиглэлд 7 хоногт 3 удаа явахаар боллоо. Энэхүү үйлчилгээнд явах автобус нь Сүхбаатараас Улаанбаатар чиглэлд лхагва, баасан, ням гарагт 10:00 цагаас “Хөх чулуут” дэлгүүрийн зогсоолоос хөдлөх аж. Харин Улаанбаатараас Сүхбаатарын чиглэлд даваа, пүрэв, бямба гарагт 11:30 цагаас “Драгон” төвөөс хөдөлж байх ажээ.
Эдгээр өдрүүдэд зорчих хөдөлгөөнд оролцох иргэд хот хоорондын https://eticket.transdep.mn/онлайнаар тасалбараа захиалж үйлчлүүлэх юм байна. Түүнчлэн эрсдэлтэй бүс нутгаас ирж байгаа 17 хүртэлх насны хүүхдүүд, дархлаажуулалтын бүрэн
тунд хамрагдаагүй, бүрэн тунд хамрагдсан ч 14 хоноогүй иргэд гэр бүлийн
гишүүдийн хамт 7 хүртэлх хоногоор тусгаарлагдах аж. Мөн бүрэн тунд хамрагдаж, 14
болон түүнээс дээш хоносон иргэд ч ковидоор өвчилж байна. Иймээс эрсдэлтэй бүсээс
ирсэн иргэн бүр, ар гэрийнхэн нь дор бүрнээ сэрэмжтэй байж, халдвар
хамгааллын дэглэм журмаа ягштал дагаж мөрдөхийг аймгийн Онцгой комиссоос онцгойлон
анхааруулж байна.
