Улаанбаатар
“COVID-19” халдварын тохиолдол 326 болов
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. ЭМЯ-ны мэдээлснээр, ХӨСҮТ, ЗӨСҮТ, Дархан-Уул, Сэлэнгэ аймгийн вирус судлалын лабораторид өчигдөр 956 сорьцод шинжилгээ хийхэд хоёр тохиолдол илэрчээ.
Ингэснээр манай улсад COVID-19” халдварын 326 тохиолдол бүртгэгдлээ. Үүнээс 312 нь эдгэрсэн бол коронавируст халдварын улмаас ХӨСҮТ-д 14 хэвтэн эмчлүүлж байна. Тэднээс есөн хүний биеийн байдал хөнгөн, тав нь хүндэвтэр байгаа аж.
Эдгэрсэн хүмүүсээс хяналтад тав, гэрийн ажиглалтад 9 хүн байгаа бол 298 хүний ажиглалт тандалтын хугацаа дуусжээ.
Ташрамд дурдахад, дэлхий дахинд өнгөрсөн 24 цагийн хугацаанд 338 мянган хүн шинээр халдварлаж, 4 мянга гаруй хүн нас барсан байна. Харин 222 мянган хүн эдгэрчээ.
