Э.Тамираа: Цаашид улсын цолонд хүрэхийг зорьж байна
ОРОН НУТГИЙН МЭДЭЭ | БАЯН-ӨЛГИЙБаян-Өлгий /МОНЦАМЭ/. Тулгар төрийн 2229, Их
Монгол Улсын 814, Ардын хувьсгалын 99 жилийн ой, Баян-Өлгий аймаг
байгуулагдсаны 80 жилийн ойн баяр наадмын хүчит бөхийн барилдаанд
найм даван түрүүлсэн тус аймгийн Бугат сумын харьяат, Онцгой байдлын
газар, “Цамбагарав-Өгөөж” компанийн бөх аймгийн арслан
Энхболдын Тамираатай ярилцлаа.
- Юуны
өмнө аймгийнхаа баяр наадамд амжилттай барилдаж түрүүлсэн явдалд баяр хүргэе.
- Баярлалаа.
- Хэдэн
наснаасаа үндэсний бөхөөр хичээллэж эхэлсэн вэ?
- Би
16 настайгаасаа үндэсний бөхөөр барилдаж эхэлсэн. Одоо 21 настай.
- Бөхийн
замналыг өөрийнхөө сонирхлоороо сонгосон уу? Эсвэл өөр хэн нэгэн нөлөөлсөн
болов уу?
- Манай
аав, мөн авга ах Энхбат нар бөх болоход минь нөлөөлсөн. Өөрөө бас багаасаа бөх
барилдахыг мөрөөддөг байлаа.
- Танай
удамд бөхчүүд олон байсан гэж сонссон. Энэ талаар ярихгүй юу.
- Тийм
ээ. Манай ээжийн аав Д.Тогтох нь аймгийн заан цолтой хүн байсан. Нагац өвөөгийн
дүү Д.Баакаа бас аймгийн заан цолтой байжээ. Баян-Өлгий аймгийн түүхэнд
ах, дүү заанууд хэмээн ард олондоо хүндлэгдсэн хүмүүс юм. Тогтох, Баакаа нарын
аав Дамбил гэдэг хүн аймгийн арслан цолтой байсан байна лээ.
Нагац талаараа бөхийн удамтай.
- Бөхийн
спортоор хичээллэхэд зааж сургадаг хүмүүс байгаа байх. Багш нарынхаа талаар
ярьж өгөөч.
- Анхны
багш маань Сэлэнгэ аймгийн Орхонтуул сумын харьяат улсын харцага Т.Өсөх-Ирээдүй
байгаа. Одоо Ховд аймгийн Буянт сумын харьяат улсын харцага О.Хангайн удирдлага
дор бэлтгэлээ хийж байна.
- Анхны
цолоо хэзээ, хаана барилдаж авч байсан вэ?
- Анх
2017 онд Сэлэнгэ аймгийн Шаамар сумын баяр наадамд түрүүлж сумын заан цол
хүртсэн. 2018 онд Баян-Өлгий аймгийн баяр наадамд тав давж аймгийн начин цолны
болзлыг хангасан байгаа.
- Богино
хугацаанд амжилтаа ахиулж, 21 насандаа аймгийнхаа баяр наадмын түрүү бөхөөр
тодров. Ийм амжилт гаргахад юу нөлөөлсөн гэж бодож байна?
- Юуны
өмнө төрүүлж өсгөсөн аав, ээждээ баярлан талархсанаа илэрхийлмээр
байна. Дараа нь багш нарынхаа буянд л энэ жилийн наадамд түрүүлсэн гэж бодож
байна.
- Энэ
жилийн наадмын хамгийн хэцүү барилдааныг нэрлэхгүй юу?
- Хамгийн
хэцүү нь үзүүр түрүүний барилдаан байсан. Үзүүр түрүүнд Увс аймгийн Наранбулаг
сумын харьяат бөх сумын заан Б.Батбаянтай үлдэж давсан даа.
- Наадмын
бэлтгэлээ хаана базаасан вэ?
- Бэлтгэлээ
Ховд аймагт улсын харцага О.Хангай, аймгийн арслан Б.Баянмөнх нарын
бөхчүүдийн хамт базаасан.
- Наадмын
өмнө түлүүлнэ гэж бодож байсан уу?
- Хүнд
мэдрэмж гэж бас байдаг юм байна. Түрүүлэх юм шиг л санагдаад байсан. Мөн
барилдааны өмнөх өдөр түрүүлж байна гэж зүүдэлсэн.
- Цаашдын
зорилго юу вэ?
- Урдаа том
зорилго тавиад байгаа. Цаашид улсын цолонд хүрэхийг зорьж байна. Дээшээ үзэх л
зорилготой. Бөхийн спортоор хичээллэхийн хажуугаар Үндэсний биеийн
тамирын дээд сургуульд сурч байгаа. Сургуулиа амжилттай төгсөхийг бас хичээж
байна.
- Улсын, аймгийн хэмжээнд ямар бөхчүүдийг дэмжиж, хүндэлж явдаг вэ?
- Аймгаас бол улсын харцага О.Бахытыг маш их хүндэлдэг. Бас улсын начин Б.Баатарцол, Б.Серик, Н.Мустафа, аймгийн арслан М.Еркебулан гээд олон бөхчүүд байгаа. Түүнээс гадна улсын харцага Т.Өсөх-Ирээдүй, О.Хангай нарын багш нарыгаа хүндэлж явдаг юм.
- Өөрийн чинь
барилдааны онцлогийн талаар ярихгүй юу?
- Голдуу
золгож барилддаг. Сүүлийн үед бэлтгэл сургуулилтаа ч шуудагны барилдаанаар
базааж байгаа.
- Улсын
харцага О.Хангай багш чинь цаашид яаж барилд гэж зөвлөж байна?
- Багш
маань олон зөвлөгөө өгч байгаа. Бүх талаас тусалж дэмждэг. Бид хоёр
бусад бөхчүүдийн барилдааны бичлэгийг байнга харж судалдаг.
- Ярилцлагынхаа төгсгөлд
ард түмэндээ хандаж юу хэлэх вэ?
- Тусалж
дэмжсэн ард түмэндээ, багш нартаа баярлалаа гэж хэлье дээ.