Улаанбаатар
Мүүнизм урсгалыг Христын шашинтай холбож ойлгохгүй байхыг хүсэв
МОНГОЛЫН МЭДЭЭ | СОЁЛ УРЛАГМонголын Эвангелийн эвсэл, Монголын пастор ахлагчдын холбооноос Мүүнизм урсгалд Христийн шашин огт холбоогүй бөгөөд үүнд христэд итгэгчдийг хамаатуулан мэдээлэхгүй байхыг хүсч өнөөдөр мэдээлэл хийв.
Монголын Эвангелийн холбооны ерөнхийлөгч Д.Батбаяр "Монгол Улсын зохих хууль журмын дагуу үйл ажиллагаа явуулж байгаа Монголын Эвангелийн эвслийн гишүүн чуулган байгууллагууд болон пастор ахлагчдын холбооны пастор, гишүүд, нийт христэд итгэгчдийн нэр хүнд, эрх ашиг хөндөгдөж, олон нийтэд мүүнизм урсгалыг христийн шашинтай хамаатай мэтээр мэдээлж байна. Түүнчлэн тухайн мэдээллийг түгээхдээ христэд итгэгчдийн гэрэл зургийг ашиглаж байна. Мүүнизм болон өөр бусад урсгалуудад танихгүй хүнтэй гэр бүл болгох, нийгмээс тусгаарлах, гэр бүлтэй нь уулзуулахгүй байх зэргийг шаарддаг бөгөөд эдгээр зан үйл нь Христийн шашны Библийн номлолоос эсрэгээрээ байдаг" гэв.
Монголын Эвангелийн эвсэл нь шашны гаж урсгалаас итгэгчдээ хамгаалах, олон нийтэд христийн номлолыг хүргэх, бэхжүүлэх чиглэлээр үйл ажиллагаа явуулдаг аж.
С.Сайнзаяа
