Улаанбаатар
Х.Баделхан сайд “ТИКА”-ын Ерөнхий зохицуулагч Вэйсэл Чифтиг хүлээн авч уулзав
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. БХБ-ын сайд Х.Баделхан өнөөдөр БНТУ-ын “ТИКА” Олон улсын байгууллагын Улаанбаатар хот дахь хөтөлбөрийн ерөнхий зохицуулагч Вэйсэл Чифти тэргүүтэй төлөөллийг хүлээн авч уулзлаа.
Уулзалтад Туркийн талаас Станбул хотын Засаг даргын ахлах зөвлөх бөгөөд Иргэдийн хурлын төлөөлөгч Исмайл Хаккы Тунг, Станбул хотын “Авто зохисол“ компанийн Ерөнхий захирал Нуретин Коркут, Станбул хотын инженер Мелих Мурат Кызылчелик, Коля Думай нар, манай талаас БХБЯ-ны Бодлого, төлөвлөлтийн газрын дарга Л.Батжаргал, ГХАХ-ийн дарга Л.Билэгжаргал, мэргэжилтэн Лхамсэржид нар оролцов.
Сайд Х.Баделхан олон жилийн турш манай улстай хамтран ажиллаж, харилцаагаа улам өргөжүүлж буй Турк Улсын Засгийн газар, Туркийн ард түмэнд талархаж явдгаа хэллээ. Тэрбээр “Турк улсаас манай улсад хэрэгжүүлж буй олон төсөл хөтөлбөрүүд, эмнэлгийн болон хүмүүнлэгийн буцалтгүй тусламжид манай ард түмэн талархаж байдаг. Манай барилгын салбарынхан 2005 онд анх Түрээсийн орон сууц хөтөлбөрийн талаар туршлага судлаад заримыг нь хэрэгжүүлж яваа билээ. Одоогийн байдлаар хэрэгжүүлээд үр дүнгээ өгч байгаа төслөөс дурдвал Буянт-Ухаа хороолол дахь Цэвэрлэх байгууламжийн төслийг нэрлэж болно. Хан-Уул дүүрэгт байгуулагдах 20.000 м3 хүчин чадалтай цэвэрлэх байгууламжийн барилга угсралтын ажлыг БХБЯ-ны “Дэд бүтэц” төсөл хэрэгжүүлэх нэгжийн захиалгаар Турк Улсын хөрөнгө оруулалттай “Эйч Эн Си” болон “Эртургуль” компани түншлэлээр гүйцэтгэж байгаа. Цаашид шинээр байгуулагдсан Засгийн газартай хамтран ажиллаж, ипотекийн зээлийн эх үүсвэр дутагдахад дэмжлэг үзүүлэх чиглэлээр хөрөнгө оруулах боломжтой” гэв.
Үүнд Станбул хотын Засаг даргын зөвлөх бөгөөд Иргэдийн хурлын төлөөлөгч Исмайл Хаккы Тунг “Биднийг хүлээн авч уулзсанд баярлалаа. Танай нийслэлийн иргэдийн бараг тал хувь нь гэр хороололд амьдарч байна. Бидэнд ч ийм хүнд үе байсан. Олон төсөл хөтөлбөрүүд хэрэгжүүлсний дүнд өнөөдөр Еврод, Азийг холбосон далай дорх төмөр зам, метро, туннель зэрэг бүтээн байгуулалтын ажлыг хийж дэлхийд дээгүүрт тооцогдох болсон. Үүнд мөнгө биш тогтолцоо, улс төрийн тогтвортой байдал хамгаас чухал байдаг. Ид бүтээн байгуулалтын он жилүүдэд буюу 16 жил нэг нам л төрийн эрх барих хооронд бид энэ их ажлыг амжуулсан юм шүү” гэлээ.
Хоёр тал өнгөрсөн 20 жилийн хугацаан дахь түүхэнд Монголд хэрэгжүүлсэн төсөл хөтөлбөрүүдээс дурьдаж, зочид БХБ-ын сайд Х.Баделханыг өөрийн оронд урихын ялдамд тэр үеэр цаашдын хамтын ажиллагааны талаар дэлгэрэнгүй ярилцахаар болзсон юм.
