Оросын баг волейболын ЕАШТ-д түрүүлжээ
ДЭЛХИЙН МЭДЭЭ | СПОРТ
МОСКВА. /TASS/. Наймдугаар сарын 24-нөөс есдүгээр сарын 3-ны хооронд Польш улсад болсон волейболын Европын АШТ-д Оросын эрэгтэйчүүдийн шигшээ баг түрүүлжээ.
Аваргын төлөөх тоглолтод Оросын шигшээ багийнхан Германы багийг 3:2 оноогоор хожсон байна.
“Маш хүнд тоглолт байлаа. ЕАШТ-ий шувтаргын тоглолт амаргүй байх нь ойлгомжтой” гэж Польшийн Краков хотод өчигдөр болсон аваргын төлөөх тоглолтын дараа Оросын шигшээ багийн дасгалжуулагч Сергей Шляпников ярьжээ.
2017 оны ЕАШТ-ий хүрэл медалийг Сербийн баг Бельгийн багийг 3:2 оноогоор хожсоноор авсан байна.
Оросын шигшээ багийн 29 настай тоглогч Максим Михайлов ЕАШТ-ий “хамгийн үнэ цэнэтэй тоглогч”-оор тодорчээ.
Оросын эрэгтэйчүүдийн шигшээ баг 2013 онд мөн ЕАШТ-д түрүүлж байсан бол 1999, 2005 болон 2007 онд мөнгөн медаль хүртэж байжээ. Харин 1993, 2001 болон 2003 онд Оросын волейболчид ЕАШТ-ээс хүрэл медаль хүртэж байсан гэнэ.
Г.Доржханд