Орос Сирид амжилттай цохилт өгсөөр байна

Дэлхийд
aminaa@montsame.mn
2015-11-03 13:28:04

МОСКВА. /Sputnik/. Сирийн Хама, Латакия, Хомс, Дамаск, Алеппо, Хакка мужид сүүлийн 48 цагийн дотор Оросын цэргийн нисэх онгоцууд 131 удаагийн даалгавар гүйцэтгэж, “Лалын улс”, “Нусра Фронт”-ын 237 байг устгасан тухай тус улсын Батлан хамгаалах яамнаас мэдээллээ.

Оросын байлдааны Су-25 нисэх онгоц Хомс муж дахь “Лалын улс”-ын түшиц газарт цохилт өгсөн байна.

“Оновчтой цохилтын үр дүнд хамгаалалттай газар нутаг, газар доорх нуувч, ЗСУ-23 системтэй, нисэх онгоц эсэргүүцэх их бууны байршил зэргийг олж тогтоон бүрэн устгасан” гэж хошууч генерал Игорь Конашенков хэлсэн юм.

Латакия мужид тактикийн ач холбогдолтой өндөрт орших “Нусра Фронт” бүлэглэлийн командын төвийг устгажээ. Тэнд Сирийн зэвсэгт хүчний радио холбоог таслах боломжийг олгож байсан террористуудын харилцаа холбооны дамжуулах хэрэгсэл байсан байна.

“Латакия мужийн Сальма тосгоны ойролцоо “Нусра Фронт”-ын харилцаа холбооны томоохон төв байгууламжийг устгаад байна. Тактикийн ач холбогдолтой өндөрт уг байгууламж байрлаж байсан” гэж Конашенков хэлжээ.

Х.Аминаа  

 

Холбоотой мэдээ