Улаанбаатар
БАЯН-ӨЛГИЙ: Зээгтийн даваанд шуурхай ажлын баг ажиллаж байна
ОРОН НУТГИЙН МЭДЭЭ | БАЯН-ӨЛГИЙ
Өлгий, 2024 оны арваннэгдүгээр сарын 12 /МОНЦАМЭ/. Баян-Өлгий аймгийн Өлгий хотоос Цагааннуур боомт чиглэлийн улсын чанартай авто замын хэсэг болох Зээгтийн даваа буюу аймгийн төвөөс 38-45 км газарт замын нөхцөл байдал сайнгүй байна.
Учир нь тус аймгийн нутгаар өчигдрөөс хүчтэй цасан шуурга шуурч, авто замд цас ихээр хунгарлаж даваагаар тээврийн хэрэгслүүд давахад хүндрэлтэй болсон. Иймээс тус замын арчилгааг хариуцдаг "Жол" компани шуурхай ажлын баг гаргаад байгаа. Ажлын баг цас хунгарласан хэсгийн цасыг авто ачигч болон автогрейдерээр цэвэрлэж, саатсан тээврийн хэрэгслүүдийг даваагаар гарган уртасгасан цагаар ажиллаж байна.
Баян-Өлгий аймгийн нутгаар цасан болон шороон шуурга одоо ч үргэлжлэн шуурч байна.
