Улаанбаатар
D-Petition буюу Нийтийн цахим өргөдөл, гомдлын системийг энэ сарын 17-нд танилцуулна
МОНГОЛЫН МЭДЭЭ | УЛС ТӨР
Улаанбаатар, 2023 оны аравдугаар сарын 10 /МОНЦАМЭ/. УИХ-ын дарга Г.Занданшатар өнөөдөр цаг үеийн асуудлаар мэдээлэл хийж, D-petition буюу Нийтийн цахим өргөдөл, гомдлын системийг танилцууллаа.
УИХ-аас ардчилсан, ил тод, цахим, зөвлөлдөх парламентыг бий болгох зорилгоор D-parliament цахим системийг нэвтрүүлээд жил гаран болж байгаа бөгөөд энэхүү цахим системийг хөгжүүлэн D-petition буюу Нийтийн цахим өргөдөл, гомдлын системийг боловсруулж дуусаж байгаа аж. Ингэснээр УИХ бүрэн эрхээ хэрэгжүүлэхэд иргэдийн оролцоог хангах боломж бүрдэж байгааг УИХ-ын дарга Г.Занданшатар онцолж, D-petition буюу Нийтийн цахим өргөдөл, гомдлын системийг 2023 оны 10 дугаар сарын 17-нд олон нийтэд танилцуулах болно гэлээ.
Иргэд, олон нийт D-parliament цахим системийн Санал асуулга цэсээр дамжуулан хуульд оруулах нэмэлт, өөрчлөлт, олон нийтийн анхаарал татсан асуудлаарх санал асуулгад оролцох боломжтой аж. Тухайлбал, хүүхэд хамгаалал, хүүхдийн эрхийн эсрэг гэмт хэргийн ялын бодлогыг чангатгахтай холбоотой Эрүүгийн хуульд оруулах нэмэлт, өөрчлөлтийн талаар иргэнээс ирүүлсэн саналыг байршуулсан байна.
УИХ-ын Тамгын газрын Цахим парламент, инновацын газрын дарга С.Тамир, Монгол Улсын Их Хурлын тухай хуульд иргэд тодорхой асуудлыг шийдвэрлүүлэх талаар асуулт асуух, санал өгөх эрхээ УИХ-ын албан ёсны санал авах цахим хуудас, гар утас, хөдөлгөөнт төхөөрөмжид зориулсан УИХ-ын албан ёсны программ хангамжаар дамжуулан хэрэгжүүлж болно гэж заасан. Иймд хуульд зааснаар тодорхой асуудлаар ажлын хэсэг байгуулах саналыг 33 мянга ба түүнээс дээш тооны иргэн дэмжсэн бол мөн Байнгын хорооны эрхлэх асуудлын хүрээнд хяналт шалгалт явуулах саналыг 70 мянга ба түүнээс дээш тооны иргэн дэмжсэн түүнчлэн хуулийн төслийн талаарх саналыг 100 мянга ба түүнээс дээш тооны иргэн дэмжсэн бол холбогдох хууль, журмын дагуу шийдвэрлэхээр зохицуулсан хэмээн мэдээллээ.
Иргэд Нийтийн цахим өргөдөл, гомдлын системд танилт, нэвтрэлтийн “ДАН” систем болон “Цахим гарын үсэг”-ээр нэвтрэх боломжтой бөгөөд УИХ-ын Инноваци, цахим бодлогын байнгын хорооноос Цахим систем ашиглан иргэдийн оролцоог хангах, санал авах журмыг баталсан байна.
