Улаанбаатар
Өсвөр үеийнхний өвлийн Олимпын бамбарыг Өмнөд Солонгосын талд хүлээлгэн өглөө
ДЭЛХИЙН МЭДЭЭ | СПОРТ
АФИН, 2023 оны аравдугаар сарын 4 /ТАСС/. Грекийн нийслэл Афин хотын төв цэнгэлдэх хүрээлэнд нарны эрчим хүчийг ашиглан асаасан Олимпын галт бамбарыг 2024 онд БНСУ-д болох өсвөр үеийнхний IV өвлийн Олимпын тоглолтыг зохион байгуулагчдад гардуулан өглөө.
Олимпын галыг асаах ёслол 1896 онд орчин цагийн анхны Олимпын
тоглолт болж байсан Афин дахь "Панатинаикос" гэдэг эртний цагаан гантиган
цэнгэлдэх хүрээлэнд мягмар гарагт болжээ. Энэ үеэр Олимпын сүлд дуулал эгшиглэж,
Олимпын далбааг мандуулсан байна. Дараа нь БНСУ ба Грек улсын төрийн дуулал
эгшиглэж, хоёр улсын төрийн далбааг мандуулжээ.
Эртний туник загварын хувцас ба углааш өмссөн Грекийн
жүжигчин эмэгтэй их удганы дүрийг бүтээж, Нарны цацрагуудыг нэг цэгт төвлөрүүлэгч парабол
хэлбэрийн толины тусламжтайгаар Олимпын бамбарыг асаажээ. Үүний дараа уг
бамбарыг цэнгэлдэх хүрээлэн дундуур хүмүүс буухиалан барьж гүйсний дараа өсвөр
үеийнхний өвлийн Олимпын тоглолтыг зохион байгуулах хорооны дарга Чин Жон О-д хүндэтгэлтэйгээр гардуулан өглөө.
БНСУ 4 дэх удаагийн Олимпын тоглолтыг зохион байгуулах бөгөөд
анхны тоглолт 2012 онд Австрийн Инсбрук хотод, II тоглолт – 2016 онд Норвегийн
Лиллехаммерт, гуравдахь нь 2020 онд Швейцарын Лозанна хотод тус тус болж байв.
Өсвөр үеийнхний IV өвлийн Олимпын тоглолт Өмнөд Солонгосын
Канвондо мужид 2024 оны 1 дүгээр сарын 19-нээс 2 дугаар сарын 1-нд явагдах юм.
Тус Олимпод оролцох дэлхийн 70 улсын 1900 гаруй тамирчид 81 багц медалийн төлөө
хоккей, уран гулгалт, гүйлтийн цана, биатлон, тэшүүр, чарга, сноуборд, трамплинаас
үсрэлт, шорт-трек, керлинг, фристайл, уулын цана, бобслей, скелетон, цанын хоёр
төрөлт гэсэн төрлүүдээр өрсөлдөнө.
