Уул уурхайгаас эдийн засагт оруулж буй хувь нэмрийг тодорхойлно

МОНГОЛЫН МЭДЭЭ
ariunzaya@montsame.mn
2016-09-14 12:57:49

Үндэсний Статистикийн Хороо, НҮБ-ын Статистикийн хэлтэстэй хамтран “Байгалийн нөөцөд суурилсан эдийн засгийн статистикийн Улаанбаатар хотын групп”-ын Удирдах зөвлөлийн 5 дахь удаагийн хуралдааныг Улаанбаатар хотноо зохион байгуулж байна.

Хуралдаанд Австрали, ОХУ, Вьетнам, БНЭУ, Иран, НҮБ-ын Аж үйлдвэрийн хөгжлийн байгууллага, Олон улсын валютын сан, НҮБ-ын Ази, Номхон Далайн бүс нутгийн Эдийн Засаг-Нийгмийн Комисс зэрэг улс, олон улсын байгууллагын төлөөлөгчид оролцож байна.

 Байгалийн нөөцөд суурилсан эдийн засагтай улс орнуудын уул уурхайн салбараас эдийн засагт оруулж буй хувь нэмрийг бүрэн гүйцэд тодорхойлох, нийгэм, байгаль орчинд үзүүлэх нөлөөллийг бодитой тооцох онол, арга зүйн сайн туршлагыг нэгтгэхэд төлөөлөгчид саналаа тусгуулна. Тодруулбал дэлхийн улс орнуудын статистикийн үйл ажиллагаанд ашиглах “Байгалийн нөөцөд суурилсан эдийн засгийн статистик” гарын авлагыг эцэслэн боловсруулж, АНУ-ын Нью-Йорк хотноо 2017 оны 3 дугаар сард болох Статистикийн комиссын 48 дугаар чуулганаар хэлэлцүүлж батлуулах юм.

“Байгалийн нөөцөд суурилсан эдийн засгийн статистикийн Улаанбаатар хотын групп”-ыг байгуулах санаачлагыг 2012 онд АНУ-ын Нью-Йорк хотноо хуралдсан Нэгдсэн Үндэстний Байгууллагын Статистикийн Комиссын ээлжит 43 дугаар чуулганаар  гаргажээ.

Тус хуралдаан энэ сарын 16-ныг хүртэл үргэлжилнэ.

 Б.Заяа

Холбоотой мэдээ