Японы мэргэжлийн багтай ОУХМ Б.Марал-Эрдэнэ, Б.Болор-Эрдэнэ нар гэрээ хийжээ

Монголын мэдээ | Спорт
dusem11@yahoo.com
2022-01-24 10:28:15

Улаанбаатар /МОНЦАМЭ/. Японы мэргэжлийн дугуйн “Levante Fuji Shizuoka баг Монголын 2 дугуйчинтай 2022 оны улирлын турш хамтран ажиллах гэрээ байгуулжээ.


Монголын дугуйчид олимпын эрх авахад мэргэжлийн баг байгуулах буюу мэргэжлийн багт орж уралдан UCI-ийн хуваарьт орсон мэргэжлийн тэмцээнүүдээс оноо цуглуулах өндөр шалгуур журамтай болсон билээ.


Энэхүү журам нь 1995 онд Олон улсын сонирхогчдын болон мэргэжлийн дугуйчдын холбоо нэгдсэнээр мэргэжлийн дугуйчид олимпод оролцох болж чансаагаар шалгарсан Дэлхийн шилдэг 50 орноос зөвхөн 200 дугуйчин оролцох эрхтэй болжээ.


Иймд Монголын дугуйн холбоо /МДХ/-ноос “Парис-2024” олимпын наадамд эрх авахын тулд холбооныхоо дэргэд Мэргэжлийн баг байгуулан, мөн шилдэг тамирчдаа гадаадын мэргэжлийн багуудад бүртгүүлсээр байна.


Одоогоор Монголын шилдэг 19 дугуйчин мэргэжлийн багуудад бүртгүүлснээс ОУХМ С.Жамбалжамц Малайзын “Terengganu cycling team” багт, ОУХМ Б.Марал-Эрдэнэ, Э.Болор-Эрдэнэ нар Японы “Levante Fuji Shizuoka” багт ороод байна.


Харин ОУХМ Б.Мягмарсүрэн, Б.Тэгшбаяр, Э.Билгүүнжаргал, Б.Амартүвшин, Б.Идэрболд, Э.Мөнхтулга, Б.Наранхүү, Д.Эрхэс нарын 16 тамирчин Монголын анхны мэргэжлийн баг “Ferei-Mongolia Development team” багт дасгал сургуулилалтаа базааж байна. Тэд улирлын эхний тэмцээн АНЭУ-ын “Tour of Sharjah” олон өдрийн мэргэжлийн уралдаандаа оролцохоор 1 дүгээр сарын 25-нд эх орноосоо мордох юм байна.


Монголын дугуйчдын эхний улирлын зорилго 3 дугаар сарын 25-29-нд Тажикистаны Душанбе хотод болох Ази тивийн аварга шалгаруулах тэмцээнд амжилттай оролцох явдал юм. Үүний өмнө Туркийн цуврал тэмцээнүүд, “Tour of Langkawi” зэрэг олон тэмцээн байгаа аж.

Холбоотой мэдээ