Улаанбаатар
ДЭМБ: “Омикрон” хувилбар 106 оронд бүртгэгдээд байна
ДЭЛХИЙН МЭДЭЭ | ЭРҮҮЛ МЭНД
ЖЕНЕВ. /CNN/.
Дэлхийн хэмжээнд коронавирусний “дельта”
хувилбар давамгайлан тархсан хэвээр байгаа ч “омикрон” хувилбарын тохиолдол
нэмэгдэж байна гэж Дэлхийн эрүүл мэндийн байгууллага /ДЭМБ/ мягмар гарагт мэдэгдлээ.
“COVID-19”-ийн тархалтын талаарх долоо хоног тутмын шинэ
тайланд дурдсанаар, дэлхийн хэмжээнд нарийвчлан шинжилсэн сорьцуудын 96 хувиас “дельта”
хувилбар илэрсэн нь өмнөх долоо хоногийнхоос /99.2 хувь/ ялимгүй буурсан үзүүлэлт болсон бол “омикрон” хувилбарын эзлэх хувь өмнөх долоо
хоногийнхоос 1.2 хувиар өсөж, 1.6 хувьд хүрчээ.
ДЭМБ-ын мэдээллээр, “омикрон” хувилбар 106 оронд батлагдаад байна.
“Хамгийн сүүлийн үеийн мэдээллүүд “омикрон” хувилбар “дельта”-гаас хурдан тархдаг болохыг харуулж байгаа бөгөөд коронавирусний халдвар өргөн хүрээг хамран тархсан, вакцинжуулалтын түвшин өндөр орнуудад ч ийм байдал ажиглагдаж байна” гэж тус байгууллага мэдээлжээ.
Харин шинэ
хувилбар өвчтөнүүдийг хүндээр өвчлүүлдэг эсэхийг дүгнэх баримт нотолгоо
хангалтгүй байгаа ч Их Британи, Өмнөд Африкт эмнэлэгт хэвтэн эмчлүүлэгсдийн тоо
нэмэгдэх болжээ.
“COVID-19”-ийн өвчлөл энэ эрчээрээ хурдацтай нэмэгдвэл
эмнэлгүүдийн ачаалал хэтэрч болзошгүй. Урьдчилсан мэдээллээр вакцинд бүрэн
хамрагдсан, “SARS-CoV-2” вирусээр халдварлаад эдгэрсэн хүмүүсийн
бие дэх “омикрон”-ыг саармагжуулах эсрэг биетийн түвшин буурсан байдал ажиглагдсан.
Эдгээрээс үзэхэд шинэ хувилбарын учруулж болзошгүй эрсдэл өндөр хэвээр байна”
гэж тайланд дурджээ.
