Рот, салааны захирагч нарын зөвлөгөөн болов

Монголын мэдээ | Нийгэм
dusem11@yahoo.com
2021-04-30 10:16:36

Улаанбаатар /МОНЦАМЭ/. Монгол Улсын Батлан хамгаалахын сайд, ЗХЖШ-ын даргын өгсөн үүргийн дагуу Зэвсэгт хүчний нэгтгэл, анги, байгууллагуудын рот, салааны захирагч нарын зөвлөгөөн 4 дүгээр сарын 28-29-нд “Зөв төлөвшил, зөв хүмүүжил” сэдвээр болов.


Зөвлөгөөний нэгдүгээр шатыг Зэвсэгт хүчний нэгтгэл, анги, байгууллагууд дотооддоо заагдсан хөтөлбөрийн дагуу явуулж байгаа бол, хоёрдугаар үе шат нь 5 дугаар сарын 26, 27-ны өдрүүдэд үргэлжлэн явагдах юм.


Зэвсэгт хүчний нэгтгэл, ангиудын салаа, салбарын офицеруудын цэргийн сургалт бэлтгэлийг төлөвлөх, удирдан явуулах, заах арга зүйг сайжруулах, дүрмийн дагуу цэргийн алба хаагчидтай харьцах, өөрийн удирдлагад байгаа захирагдагчдаа сурган хүмүүжүүлж, эх оронч, үндэсний үзэлтэй зөв иргэн хүн болгон төлөвшүүлэхэд энэхүү зөвлөгөөний зорилго оршиж байгаа юм.


Зөвлөгөөн эх оронч үндэсний үзэл хүмүүжлийг төлөвшүүлэх арга зам, цэргийн сургалт бэлтгэлд сургалтын тэргүүн туршлагыг нэвтрүүлэх арга зам, цэргийн алба хаагчдын сэтгэл зүй, ёс суртахууны өнөөгийн байдал, цэргийн албанд дагаж мөрдөх хууль, эрх зүй, цэргийн алба хаагчдыг сурган хүмүүжүүлэх онцлог, гэмт хэрэг, зөрчлөөс урьдчилан сэргийлэх арга зам зэрэг сэдвийн хүрээнд явагдаж байна.


Ингэхдээ “Монгол бахархал, монгол хүн байхын учир”, “Нийгмийн харилцаа ба цэргийн алба хаагчийн ёс зүй”, “Офицер, ахлагчийн хувийн хүмүүжил, нэр хүндийн асуудал”, “Хүний эрх болон цэргийн алба хаагчдын хуулиар хязгаарлагдсан эрхийн талаарх ойлголт”, “Тасаг, бүлгийн дарга нарыг сурган хүмүүжүүлэх арга зүй, хүнтэй ажиллах арга барил эзэмших нь”, “Цэргийн алба хаагчдын сэтгэл зүйд сөргөөр нөлөөлөх хүчин зүйлүүд, тэдгээрийг бууруулах арга зам”, “Архи, тамхины хор уршиг, түүнээс гарч болох сөрөг хүчин зүйлс”, “Цэргийн албаны эсрэг гэмт хэрэг” зэрэг олон сэдвээр харилцан ярилцаж байгаа юм.


Тус зөвлөгөөн Зэвсэгт хүчний нэгтгэл, анги тус бүрт нэгэн зэрэг явагдаж байгаа ба цар тахлаас урьдчилан сэргийлэх заавар, зөвлөмжийг баримтлан зохион байгуулж байна.

Холбоотой мэдээ