Улаанбаатар
БНСУ руу тусгай үүргийн нислэг үйлдэв
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Монгол Улсаас өнөөдөр БНСУ руу тусгай үүргийн нислэг үйлдлээ. Гэхдээ энэ удаагийн нислэгээр иргэдээ татан авахгүй, эмнэлгийн тоног төхөөрөмж, бусад импортын техник төхөөрөмж хүлээн авах аж.
УОК-ын шийдвэрээр өнөөдрийн байдлаар Улаанбаатар-Сөүлийн чиглэлийн тусгай үүргийн нислэгээс бусад бүх нислэгийг цуцалж хойшлуулаад байгаа юм. Тодруулбал, энэ сард тусгай үүргийн 10 нислэг үйлдэхээр төлөвлөөд байсан ч одоогийн байдлаар 4 нислэг хийгээд байна.
Одоогоор манай улсаас 106 удаагийн тусгай үүргийн нислэгээр 20 582 иргэнийг эх орондоо татан аваад байна. Мөн ОХУ болон БНХАУ-тай хиллэдэг хилийн боомтуудаар 6599 хүнийг зохион байгуулалттай татан авч, нийт дүнгээр одоогийн байдлаар 27 181 иргэнийг Монгол Улс татан авсан.
Энэ 11 дүгээр сарын байдлаар 4 удаагийн нислэг үйлдэж 602 иргэнийг татан авснаас нийт ирсэн иргэдийг дотор нь ангилбал:
- бага насны хүүхэдтэй 46,
- 24 хүн эрүүл мэндийн шалтгаантай,
- 20 өндөр настан,
- 512 иргэн бусад шалтгаанаар ирээд байна.
Бусад шалтгаантай гэсэн иргэдийн тоо сүүлийн нислэгүүдэд нэмэгдэж, энэ сард татан авсан иргэдийн 85 хувийг эзэлж буй талаар ОБЕГ-аас мэдээлж байна.
