Улаанбаатар
ӨВӨРХАНГАЙ: Хангайн бүсийн яруу найрагчдын чуулга уулзалт боллоо
ОРОН НУТГИЙН МЭДЭЭ | ӨВӨРХАНГАЙ
Арвайхээр, 2025 оны арваннэгдүгээр сарын 30 /МОНЦАМЭ/. “Гурван хангайн уянга” хангайн бүсийн яруу найрагчдын чуулга уулзалт боллоо. УИХ-ын гишүүн О.Алтангэрэлийн дэмжлэгээр аймгийн ЗДТГ, СУАЖЗГ, “Өвөрхангайн мэдээ” сонины редакци, аймгийн “Алтанбярга” утга зохиолын нэгдэл хамтран зохион байгуулсан найргийн өдөрлөг төрийн шагналт, ардын уран зохиолч, хөдөлмөрийн баатар Дэндэвийн Пүрэвдоржийн хөшөөнд цэцэг өргөх ёслолоор эхэлсэн юм.
Наадамд Монгол улсын Соёлын гавьяат зүтгэлтэн, Д.Нацагдоржийн нэрэмжит шагналт зохиолч, Утга зохиол судлаач До.Цэнджав, Соёлын гавьяат зүтгэлтэн, яруу найрагч Н.Даваадаш, “Болор цом”-ын эзэн Жа. Баяржаргал, А.Лхагваа, Ш.Лхамноржмаа гэхчлэн Монголын зохиолчдын эвлэлийн зохиолч, найрагчид урилгаар оролцон уншигч, зохиолчдын уулзалт хийлээ.
Яруу найргийн уралдаанд Архангай, Баянхонгор, Өвөрхангайн 95 найрагч уран үгсийг хэлхэн өрсөлдөж, тэргүүн байрт Архангай аймгийн найрагч Ч. Мөнхбаяр, дэд байрт Өвөрхангай аймгийн найрагч Доржпалам, гутгаар байрт Архангай аймгийн найрагч Б.Энэбиш нар шалгарлаа. Тусгай байрын шагналыг Баянхонгорын найрагчид авав. Энэ жилийн “Болор цом” наадмын тэргүүн байрын шагналт яруу найрагч Н.Минжинсайхан “Үг” мялаалга шүлгээ өргөсөн нь найрагт дуртай үзэгчдийн талархлыг хүлээлээ.
УИХ-ын гишүүн О.Алтангэрэл наадмыг нээж үг хэлэхдээ монголын утга зохиол сүүлийн жилүүдэд тогтонги байдалд орж, орчин үеийн хүмүүсийн оюуны хэрэгцээг хангаж чадахгүйд хүрч байгааг онцолж, дэлхийн дэвжээнд өрсөлдөхүйц тэсрэлт хийсэн бүтээл туурвих цаг болсныг сануулсан юм. “Гурван хангайн уянга” яруу найрагчдын чуулга уулзалт бүсийн хэмжээнд анх удаа болж буйгаараа онцлог байлаа.
