Улаанбаатар
Танилцуулгадаа хуурамч мэдээлэл оруулсан Румыны сайд огцорчээ
ДЭЛХИЙН МЭДЭЭ | УЛС ТӨР
БУХАРЕСТ, 2025 оны арваннэгдүгээр
сарын 29 /DW/. Өөрийн танилцуулгад хуурамч мэдээлэл оруулсан Румыны Батлан
хамгаалахын сайд Йонуц Моштяну огцрох өргөдлөө өгчээ.
Дээд боловсролын талаарх
мэдээлэлдээ “алдаа” гаргасан учраас сайдын албан тушаалаас огцрохоор шийдвэрлэснээ тэрбээр
өчигдөр Фэйсбүүк нийгмийн сүлжээний хуудсаараа мэдэгдсэн байна.
“Румын болон Европ тив Оросын дарамтан дор байна. Манай үндэсний аюулгүй байдлыг ямар ч хамаагүй үнээр хамгаалах ёстой. Олон жилийн өмнө миний гаргасан алдаа нь улс орныг удирдаж буй хүмүүсийн анхаарлыг өөр тийш татахыг би хүсэхгүй байна” гэж сайд өөрийн гаргасан шийдвэрийг тайлбарлахдаа хэлжээ. Сүүлийн үед Оросын дронууд Румыны агаарын хилийг зөрчиж байгаа тухай, өнгөрсөн онд тус улсад болсон сонгуульд Москва хөндлөнгөөс оролцож тухай мэдээллүүд цацагдсаар байгаа юм.
Румыны Ерөнхий сайд Илие Боложан Шадар
сайд бөгөөд Батлан хамгаалахын сайдын огцрох өргөдлийг хүлээн авснаа мэдэгдээд,
Эдийн засаг, аялал жуулчлалын сайд Раду Мируцэ-д Батлан хамгаалахын сайдын
үүрэгт ажлыг түр хугацаанд гүйцэтгэхийг даалгажээ.
1990-ээд сүүлчээр Бухарест хотын Athenaeum
их сургуульд менежментийн мэргэжлээр суралцаж байсан гэх худал мэдээллийг Моштяну
өөрийн танилцуулгад оруулсныг Libertatea сонинд мэдээлснээр дуулиан дэгдсэн
байна. Их сургуулийн захиргаа мэдээллийг няцааж, тус сургуульд ийм нэртэй
оюутан огт суралцаж байгаагүй бөгөөд менежментийн хичээл 2020 онд сургалтын
хөтөлбөрт орсон гэж мэдэгджээ.
Йонуц Моштяну дээрх сонины мэдээлэл
үнэн болохыг хүлээн зөвшөөрөөд баасан гарагт уучлал хүссэн байна. Ингэхдээ
тэрбээр Bioterra их сургуулийг бакалавр зэрэгтэй төгссөнөө баталж дипломоо
нийгмийн сүлжээнд нийтэлж үзүүлжээ. Харин маргааш өдөр нь огцорно гэдгээ
мэдэгдсэн байна.
