Улаанбаатар
ШӨХТГ иргэдийн гомдлын дагуу газар дээр нь ажиллаж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. “COVID-19”-ийн цар тахлын халдварын шинэ нөхцөл байдал
үүссэнтэй холбоотойгоор бараа бүтээгдэхүүний үнийг нэмж байна гэсэн гомдол өнөөдөр ШӨХТГ-ын 115 дугаарын утсанд 470 удаа иржээ.
Утсаар ирсэн санал гомдлын дагуу болон өнөөдөр өглөө “Хүчит
шонхор” захаас ирсэн дуудлагын дагуу ШӨХТГ-ын ажилтнууд, улсын байцаагч нар газар
дээр нь шалгаж ажиллан мах болон бусад хүнсний бүтээгдэхүүний үнийг
нэмснийг тогтоож, “Хүчит шонхор” болон “Таван-Эрдэнэ” захыг Зөрчлийн тухай
болон бусад хуулийн дагуу тус бүр 20 сая төгрөгөөр торгож махны үнийг хэвийн
байдалд нь буулгаад байгаа талаар ШӨХТГ-ын Хэрэглэгчийн эрхийг хамгаалах газрын дарга Ш.Цэрэндулам өнөөдөр мэдэгдэв.
Нийслэл хотод
хөл хорио тогтоосонтой холбоотойгоор хүнсний бүтээгдэхүүний зохиомол хомсдол
бий болгож, үнийн хөөрөгдөл үүсгэсэн ААН-д хатуу арга хэмжээ авна гэдгийг ШӨХТГ-аас мэдээлж байна. Тус байгууллагад өнөөдөр ирсэн 470 гаруй
дуудлагын:
- 260
нь махны
үнэ нэмсэнтэй холбоотой,
- 155 нь амны хаалтны
үнийг нэмсэн,
- 30
нь өндөг
болон бусад бүтээгдэхүүн,
- 25
нь өргөн
хэрэглээний бараа бүтээгдэхүүнтэй холбоотой иржээ.
ШӨХТГ-аас зах, худалдааны төв, сүлжээ
дэлгүүр, эмийн сан, эм эмнэлгийн хэрэгсэл болон ариутгалын бодис ханган
нийлүүлэгч байгууллагад үнийн зохиомол хөөрөгдлийг үүсгэхгүй байх талаар албан
ёсны шаардлага хүргүүлсэн талаар ШӨХТГ-ын дарга Б.Бат-Эрдэнэ өнөөдөр мэдэгдсэн
юм.
