Улаанбаатар
Анхдугаар хуралдаанаар Б.Батжаргалыг ИТХ-ын даргаар сонгов
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. Аймгийн ИТХ-ын анхдугаар хуралдаан товын дагуу өнөөдөр өглөө 11.00 цагт хуралдах байсан ч хойшилсоор 15.40 цагт төлөөлөгчдийн 100 хувийн ирцтэй эхэлсэн юм. Анхдугаар хуралдааны эхэнд ард түмний итгэлийг хүлээж, ялалт байгуулсан 39 төлөөлөгчийн бүрэн эрхийг баталгаажуулж, төлөөлөгчийн тэмдгийг гардууллаа.
Өнөөдрийн хуралдаанаар ИТХ-ын даргыг
сонгох, ИТХ-ын Тэргүүлэгчдийн тоог тогтоож, сонгох, аймгийн Засаг даргад нэр
дэвшүүлэх гэсэн гурван асуудлыг хэлэлцэнэ. Хуралдааны дэг ёсоор аймгийн ИТХ-д олонх болсон АН-аас Батсуурийн Батжаргалыг нэр дэвшүүлсэн бол МАН-аас ард түмний
сонголтыг хүндэтгэж, нэр дэвшүүлээгүй юм.
Ингээд Архангай аймгийн ИТХ-ын
даргаар АН-аас нэр дэвшүүлсэн Б.Батжаргалыг нийт 39 төлөөлөгчийн 20 буюу 51.3
хувийн саналаар сонгож, анхдугаар хуралдаанаа удирдуулж байна.
Аймгийн ИТХ-ын шинэ дарга
Б.Батжаргал хуралдаанаа удирдаж, Тэргүүлэгчдийн тоог тогтоож, сонголоо. 11 Тэргүүлэгч байх ба АН-аас Б.Батжаргал, Б.Оюунтүвшин, Д.Бат-Эрдэнэ,
Г.Алтан-Очир, Д.Бат-Эрдэнэ, Л.Лхагвадорж, Б.Санжмятав, Р.Нямдорж, МАН-аас
Б.Цэрэннадмид, Ц.Мөнхнасан, Д.Мөнхбат нарын нэрийг дэвшүүлж, төлөөлөгчдийн 100
хувийн саналаар ИТХ-ын Тэргүүлэгчээр сонгов.
Аймгийн Засаг даргад нэр дэвшүүлэх
тухай асуудал эхлэхэд АН-аас Д.Золжаргалын нэрийг дэвшүүлсэн бөгөөд МАН-ын
бүлгээс 30 минутын завсарлага авснаар анхдугаар хуралдаан түр завсарлаад байна.
