Улаанбаатар
Зах худалдааны төв, хүнсний дэлгүүр хэвийн ажиллана
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. НОБГ, НМХГ, НЗДТГ, НЭМГ, нийслэлийн Агаарын бохирдолтой тэмцэх газар хамтран цаг үеийн нөхцөл байдлын талаар мэдээллээ.
Өнгөрсөн амралтын өдрүүдэд угаарын хийнд хөнгөн хэлбэрээр хордсон
гэх дуудлага 17 өрх Яаралтай түргэн тусламжийн төвд хандаж, эмнэлгийн
тусламж үйлчилгээ, зөвлөмжийг авсан байна. Нийслэлийн хэмжээнд обьектын гал
түймрийн дуудлага өнгөрсөн оны мөн энэ үетэй харьцуулахад 38 хувиар, эрэн хайх,
аврах ажиллагааны дуудлага 35 хувиар тус тус буурсан талаар НОБГ-ын Гамшгаас
урьдчилан сэргийлэх хэлтсийн дарга Г.Нэргүй мэдээллээ.
Агаарын чанарын мэдээллийн хувьд PM10 тоосонцор
өнгөрсөн оны мөн энэ үетэй харьцуулахад 40 хувиар, PM 2.5 тоосонцор 55 хувиар
буурсан үзүүлэлт гарчээ. Сар шинийн өдрүүдэд сайжруулсан түлшний хомсдол үүссэн
талаар иргэдийн зүгээс гомдол ирээгүй, түлшний түгээлт нийлүүлэлт, борлуулалт
хэвийн ажиллажээ.
“Covid-19” буюу шинэ төрлийн халдвараас урьдчилан сэргийлэх ажлын
хүрээнд нийслэлийн 6000 гаруй албан хаагчид эргүүл хийж, иргэдэд зөвлөмж
мэдээллийг хүргэж ажиллаж байгаа. Түүнчлэн нийслэлийн Онцгой байдлын шийдвэрээр
бар, цэнгээний газрууд, караоке, фитнесс, саун, иог, цэнгээнт бүжиг, дэн
буудал, амралтын газар, цанын бааз зэргийн үйл ажиллагааг гуравдугаар
сарын 30-ны өдөр хүртэл зогсоосон юм. Мөн нийтийн тээврийн үйлчилгээг тусгай
хуваарьт шилжүүлж, өглөө 07.00 -10.00, орой 17.00-21.00 цагт хэвийн үйлчлэх
бөгөөд өдрийн цагаар цөөн тооны автобусыг үйлчилгээнд гаргахаар болжээ.
НМХГ-ын дарга
Л.Эрдэнэчулуун хэлэхдээ, “Нийслэлийн Засаг даргын
захирамжийн хүрээнд нийт 945 бар цэнгээний газар, 310 дэн буудал, 69 амралтын
газар, 87 саун, 59 фитнесс, 321 сүм хийдийн үйл ажиллагааг зогсоолоо. Хэрэв
захирамжийг зөрчсөн тохиолдолд иргэнийг сая 500, аж ахуйн нэгж байгууллагыг 5
сая төгрөгөөр торгоно. Иргэдийн мэдээллийн дагуу Цагдаагийн газар, Мэргэжлийн
хяналтын албан хаагчид хяналт тавина. Хүнсний чиглэлийн үйлдвэрлэл, худалдааг
зогсоохгүй. Зах худалдааны төвүүд, хүнсний дэлгүүрийн үйл ажиллагаа хэвийн
үргэлжилнэ” гэв.
“Covid-19” буюу шинэ төрлийн халдвар өнөөдрийн байдлаар 41 улсад бүртгэгдээд байгаа бөгөөд зургаан улсад халдвараас нас барсан тохиолдол гарчээ. Монгол Улсын хувьд энэ төрлийн халдвар бүртгэгдээгүй ч дамжин орж ирэх өндөр магадлалтай байгаа учир иргэдийг хувийн ариун цэврийг сайтар хангахыг НЭМГ-ын хэлтсийн дарга О.Энхзаяа сэрэмжлүүллээ.
