Улаанбаатар
Оросын хийг Украинаар дамжуулан тээвэрлэх гэрээнд гарын үсэг зурлаа
ДЭЛХИЙН МЭДЭЭ | ЭДИЙН ЗАСАГ
МОСКВА. /RIA Novosti/. ОХУ болон Украин 2020 оны нэгдүгээр сарын 1-нээс эхлэн Оросын байгалийн хийг Украины нутгаар дамжуулан тээвэрлэх боломж олгох багц баримт бичигт гарын үсэг зурсан тухай "Газпром" компанийн тэргүүн Алексей Миллер сэтгүүлчдэд мэдээлжээ.
“Хоёр тал Вена хотод таван өдрийн турш хэлэлцээ хийснийхээ дараа эцсийн шийдвэрүүдийг гаргаж, эцсийн тохиролцоонд хүрлээ. Үүний зэрэгцээ бүхэл бүтэн багц гэрээ, хэлэлцээрт гарын үсэг зурсан, эдгээр нь талуудын ашиг сонирхлын тэнцлийг сэргээсэн үнэхээр том багц гэрээ юм” гэж А.Миллер мэдэгдсэн байна.
“Эдгээр баримт бичиг өнөөдрөөс эхлэн хүчин төгөлдөр болох бөгөөд ирэх оны нэгдүгээр сарын 1-нээс эхлэн Оросын хийг Украины нутгаар дамжуулан тээвэрлэх боломж олгоно” гэж тэрбээр онцлон тэмдэглэв. "Газпром" компанийн хэвлэлийн албанаас мэдээлснээр, баримт бичгүүд 12 дугаар сарын 30-наар өдөрлөгджээ.
"Газпром" болон " Нафтогаз" компани байгалийн хийг Украинаар дамжуулан тээвэрлэх гэрээ байгууллаа. Дамжин өнгөрөх тээврийг “Нафтогаз” компани зохион байгуулна гэж "Газпром"-ын хэвлэлийн мэдээлэлд дурдсан байна.
Энэхүү баримт бичигт эхний жилд 65 тэрбум шоо метр, дараагийн дөрвөн жилд 40 тэрбум шоо метр хий нийлүүлэхээр тусгажээ. Зохион байгуулагч компани нь Украины хийн тээврийн системийн хүчин чадлыг таван жилийн хугацаанд 225 тэрбум шоо метр нөөцөөр хадгалах ёстой аж.
