Улаанбаатар
Төв Азийн бүсийн түймрийн менежментийн нөөцийн төвийн нээлт боллоо
МОНГОЛЫН МЭДЭЭ | БАЙГАЛЬ ОРЧИНТөв Азийн бүсийн түймрийн менежментийн нөөцийн төв (ТАБТМНТ)-ийн нээлтэнд зориулсан сургалт өчигдөр Монгол-Японы соёлын төвд боллоо.
Сургалтыг БОНХАЖ-ын дэд сайд М.Хүрэлсүх нээж хэлсэн үгэндээ, “Хил нэвтрэхдээ хэнээс ч асуудаггүй, ямар ч зөвшөөрөл хэрэггүй, гамшиг дагуулдаг зүйл бол түймэр. Тийм учраас бид хамтран ажиллаж, туршлага солилцож ажиллах нь хамгаас чухал юм. Ялангуяа хил залгаа оршдог орнуудад энэ нь хамгийн чухал, анхааралдаа авах ёстой гамшиг. Энэхүү Төв Азийн бүсийн түймрийн менежментийн нөөцийн төвийн нээлтэд зориулсан анхны сургалтыг зохион байгуулж байгаад баяртай байна. Цаашдаа олон ажилд та бүхэнтэй хамтран ажиллана гэдэгт итгэлтэй байна” гэлээ.
Тус суралтад МУИС-ийн дэд захирал Проф.Др.Б.Болдгив, Европын аюулгүй байдал, хамтын ажиллагааны байгууллагын Эдийн засаг, хүрээлэн буй орчны газрын хөтөлбөрийн зохицуулагч Хатагтай Есра Буттанри, Дэлхийн түймрийн мониторингийн төвийн захирал Проф.Др.Ёханн Г.Голдаммер, Онцгой байдлын ерөнхий газрын Гал түймэртэй тэмцэх газрын дарга, хурандаа С.Залуухүү зэрэг албаны хүмүүс болон Казахстан, Узбекстан, Киргизстан улсын төлөөлөгч нар оролцож, Төв Азийн орнуудын байгалийн түймрийн нөхцөл байдал ба түймрийн менежментийн өнөөгийн байдлын талаар илтгэл хэлэлцүүлсэн юм. Энэхүү сургалт энэ сарын 25-ыг хүртэл үргэлжлэх бөгөөд өнөөдөр Түймрийн менежментийн хээрийн сургалтыг Төв аймгийн Батсүмбэрт зохион байгуулна.
Б.Туул
Сэтгэгдлүүд