Агаарын тоосонцрын хэмжээ 60 орчим хувиар буурчээ

Монголын мэдээ | Нийгэм
bolor@montsame.mn
2019-12-02 11:41:37

Улаанбаатар /МОНЦАМЭ/. Нийслэлийн Мэргэжлийн хяналтын газар, Агаарын бохирдолтой тэмцэх газар сайжруулсан түлштэй холбоотой цаг үеийн асуудлаар өнөөдөр мэдээллээ.

Өнгөрсөн амралтын өдрүүдэд Яаралтай түргэн тусламжийн төвд угаарын хийнд хүнд, хөнгөн хэлбэрээр хордсон гэх зургаан дуудлага ирж, эмнэлгийн тусламж үйлчилгээ авсан байна. Дуудлагын дагуу мэргэжлийн байгууллагынхан газар дээр нь очиж ажиллахад зуух яндангийн холбоос муу, үнсээ дүүргэсэн, шахмал түлшийг буруу хэрэглэж байсныг тогтоожээ.

НИХГ-ын дэд дарга С.Даваасүрэн, “Иргэдээс түүхий нүүрсний дуудлага их ирж байна. Дуудлагын дагуу албаныхан очиж шалгаж ажилласан. Баянгол дүүргийн 3, 7 дугаар хороо буюу утаагүй бүсэд шахмал түлш хэрэглэж байсан аж ахуйн нэгжид торгуулийн арга хэмжээ авсан. Хан-Уул дүүргийн 17 дугаар хороонд “Эко констракшн” компани панер түлж хэрэглэж байсныг илрүүлж 3 хүртэлх сая төгрөгөөр торгосон” гэв.

Агаарын чанартай мэдээллийн хувьд, өнгөрсөн долоо хоногийн хувьд PM10 буюу том ширхэгт тоосонцрын хэмжээ өнгөрсөн оны энэ үетэй харьцуулахад 60 орчим хувиар буурсан, PM2.5 буюу нарийн ширхэгт тоосонцор 50 орчим хувиар буурсан үзүүлэлт гарсан талаар нийслэлийн Агаарын бохирдолтой тэмцэх газрын мэргэжилтэн Д.Санчирбаяр мэдээллээ. Хүйтний улирал эхэлсэнтэй холбогдуулан галлагааны зөвлөмжийг дагаж, аюулгүй байдлаа хангахыг албаныхан сэрэмжлүүлэв.

Холбоотой мэдээ