Улаанбаатар
УИХ-ын Тамгын газрын ажилчид цэрэг- стратегийн бэлтгэл сургалтад хамрагдлаа
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. УИХ-ын Тамгын газраас Батлан хамгаалах яамтай хамтран Үндэсний батлан хамгаалахын их сургуулийн “Шар хад” дахь сургалтын төвд энэ сарын 19-нд зохион байгуулсан “Цэрэг-стратегийн бэлтгэл” сургалтад УИХ-ын Тамгын газрын ажилчид хамрагдлаа.
Батлан хамгаалах яамны Төрийн захиргаа, удирдлагын газрын орлогч дарга, хурандаа О.Нямчулуун сургалтыг нээж хэлэхдээ, Монгол Улсын батлан хамгаалах бодлого, тус салбарт эрх зүйн шинэчлэлтийн хүрээнд хийгдэж байгаа шинэчлэлийн талаар нэг өдрийн сургалт зохион байгуулж байгааг дурдлаа.
Дараа нь “Монгол Улсын батлан хамгаалах бодлого, эрх зүйн шинэчлэл”, “Монгол Улсын Аюулгүй байдлын орчин, хэтийн төлөв, өөрчлөлт”, “Энхийг дэмжих ажиллагаанд Монгол Улсын оролцоо”, “Монгол Улсын зэвсэгт хүчний өнөөгийн байдал, хөгжлийн чиг хандлага” сэдвээр Үндэсний батлан хамгаалахын их сургуулийн багш нар хичээл заав.
Үргэлжлүүлэн сургалтад оролцогчид Зэвсэгт хүчинд хэрэглэж байгаа зарим зэвсэглэл, техниктэй танилцаж, “Галын бэлтгэл” хичээлээр гар буу, автоматын анхны дасгалыг боловсрууллаа.
Энэ үеэр Үндэсний батлан хамгаалахын их сургуулийн Сургалтын хэлтсийн дарга, дэд хурандаа Б.Мандахбаяр, “Энэхүү сургалт, дадлага нь бие бүрэлдэхүүнд цэрэг, эх оронч хүмүүжлийг олгох зорилготой. Үндэсний батлан хамгаалахын их сургуулиас Батлан хамгаалахын сайдын тушаалаар бүх шатны засаг дарга нар болон УИХ-ын тамгын газрын ажилтныг хоёр жилд нэг удаа сургалт, дадлагад хамруулдаг. Сургалтад оролцогчид батлан хамгаалахтай холбоотой хууль, журам, дүрмийг судлахаас гадна батлан хамгаалах стратегийн хүрээнд тавигдаж байгаа шаардлагуудын талаар онолын хичээлд хамрагддаг” гэв.
Сургалт, дадлагын төгсгөлд “Онц буудагч”-аар шалгарсан УИХ-ын Тамгын газрын Аюулгүй байдал, гадаад бодлогын байнгын хорооны зөвлөх Б.Түвшинтөгс, Гадаад харилцааны хэлтсийн референт Г.Булган, Өргөдлийн байнгын хорооны Нарийн бичгийн дарга Г.Нямсүрэн нарт Батлан хамгаалах яамны Стратегийн бодлого, төлөвлөлтийн газрын мэргэжилтэн, дэд хурандаа С.Рагчаадорж Батлан хамгаалах яамны дурсгалын медалион гардуулж, баяр хүргэв гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
