Улаанбаатар
Гадаад худалдааны тэнцэл 2020-2022 онд нэг тэрбум ам.долларын ашигтай байна
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. УИХ-ын чуулганы өнөөдрийн хуралдаанаар Монгол Улсын нэгдсэн төсвийн 2020 оны төсвийн хүрээний мэдэгдэл, 2021-2022 оны төсвийн төсөөллийн тухай хуулийн төсөл болон “Засгийн газрын өрийн удирдлагын 2019-2022 оны стратегийн баримт бичиг батлах тухай” тогтоолыг батлав.
Засгийн газар Монгол Улсын эдийн засаг 2020-2022 онд 6.3 хувиар өсөж,
инфляцийн түвшин 8 хувьтай байна гэж тооцжээ. Мөн гадаад худалдааны тэнцэл нэг
тэрбум ам.долларын ашигтай байх бол 2020 онд төсвийн алдагдал ДНБ-ий эзлэх хувь
хэмжээгээр 5.1 хувьтай байхаар тооцсон нь энэ оныхоос 0.3 хувиар сайжрах
үзүүлэлт аж.
Засгийн газар 2021-2024 онд томоохон бондуудын өр төлж эхэлнэ. Энэ
төлбөрийг эдийн засаг, төсөвт дарамт учруулахгүй төлөх стратегийг
боловсруулжээ. Уг эргэн төлөлттэй холбогдуулан төсвийн алдагдлыг Төсвийн
тогтвортой байдлын тухай хуульд заасан хэмжээнээс 2021 онд илүү сайжруулан,
2021 онд ДНБ-ий 2.8 хувь, 2022 онд 1.4 хувь, 2023 оноос эхлэн ашигтай байхаар
тус тус төсөөлжээ. Монгол Улсын Засгийн газрын мөрийн хөтөлбөрт тусгагдсан
зорилтыг хэрэгжүүлэх, төсвийн нэгдмэл, тэнцвэртэй байдлыг хангах тогтвортой байдлыг
хангах замаар макро эдийн засгийн жигд өсөлтийг дэмжих бодлого баримтлахаар
тусгажээ.
Дунд хугацаанд төрийн албан хаагчдын цалин хөлс, тэтгэвэр тэтгэмжийг инфляцийн түвшинтэй уялдуулан нэмэх, төсвийн тэгш бус хуваарилалтыг бууруулж, ил тод, шударга, оновчтой байлгаж, үр ашгийг сайжруулах бодлогоо үргэлжлүүлэх юм. Түүнчлэн Монгол Улсын Засгийн газрын 2016-2020 оны үйл ажиллагааны хөтөлбөрт тусгасан Байгалийн түүхийн музей, Үндэсний урлагийн их театр барих ажлыг эхлүүлэхээр төлөвлөсөн байна.
Хууль, тогтоолын төслийн хэлэлцүүлгийн үеэр УИХ-ын гишүүн М.Билэгт валютын
ханшийн өсөлтөөс шалтгаалан иргэдийн худалдан авах чадвар алдагдаж байгааг
шүүмжлэв. Тэрбээр, валютын ханшийг бууруулах, төгрөгийн ханшийг өсгөхөд Засгийн
газар, Монголбанк бодлогоо нэгтгэн ажиллах шаардлагатай байгааг дурдсан юм.
Харин УИХ-ын гишүүн Д.Лүндээжанцан, “Монгол Улсын бүх хөрөнгө, санхүүг
Сангийн яам хариуцдаг. Гэхдээ Сангийн яам дангаараа хөгжлийн том бодлогуудыг
хэрэгжүүлж чадахгүй. Тиймээс цаашдаа жил бүрийн улсын төсвийг боловсруулахдаа
урт хугацааны хөгжлийн бодлого, түүнд зарцуулах хөрөнгө, эх үүсвэрийг бүх
талаас нь нарийн тооцдог болох ёстой” хэмээв.
Ийнхүү санал хураахад хуралдаанд оролцсон гишүүдийн 64.3 хувь дэмжиж,
баталсан юм.
