Улаанбаатар
Сонгуулийн тухай мэдээ уншихдаа болгоомжтой байхыг сонгогчдод хандан хүсчээ
ДЭЛХИЙН МЭДЭЭ | УЛС ТӨР
ВАШИНГТОН. /RIA Novosti/. АНУ-ын Конгрессын завсрын сонгуулийг гадны нөлөөнөөс хамгаалахын тулд тус улсын тусгай алба хоёр энгийн зөвлөмжийг сонгогчдод өгчээ. Энэ тухай АНУ-ын Холбооны мөрдөх товчоо, Хуульзүйн яам, Үндэсний тагнуулын алба болон Дотоодын аюулгүй байдлын яамнаас гаргасан мэдэгдэлд дурдсан байна.
“Сонгогчид сонгуулийн тухай мэдээллийг анхны эх сурвалжаас авах, сонгуультай холбоотой мэдээллүүдийг уншихдаа болон бусадтай хуваалцахдаа илүү болгоомжтой байх гэсэн энгийн алхамуудыг хэрэгжүүлснээр манай улсын сонгуулийг гадны нөлөөллөөс хамгаалахад тусална” гэж баримт бичигт дурджээ.
Сонгуулийг хамгаалахын тулд урьд өмнө хэрэгжүүлж байгаагүй арга хэмжээг авсан гэдгийг дээр дурдсан байгууллагуудын удирдлагууд Америкийн иргэдэд батлан хэлсэн байна.
Санал хураах байруудын талаарх мэдээллийг цуглуулах, дүн шинжилгээ хийх төв байгуулсныг АНУ-ын Дотоодын аюулгүй байдлын сайд Кирстен Нильсен урьд нь мэдээлжээ. Сонгуулийн өдрүүдэд бүх 50 муж улс болон орон нутгийн 1000 байгууллагыг нэгтгэсэн тус төв сонгуулийн үйл ажиллагааг хянах аж.
Арваннэгдүгээр сарын 6-нд болох сонгуулиар АНУ-ын Конгрессын Төлөөлөгчдийн танхимын 435, Сенатын танхимын 35 гишүүнийг сонгоно.
