Пак Обаматай Умард Солонгосын цөмийн асуудлыг хэлэлцэнэ

Дэлхийд
jargal@montsame.mn
2015-10-16 12:45:14

ВАШИНГТОН. /TASS/. Өмнөд Солонгосын Ерөнхийлөгч Пак Гын Хэ өнөөдөр Цагаан ордонд айлчлах үеэрээ Умард Солонгосын цөмийн хөтөлбөрийн эргэн тойронд үүссэн нөхцөл байдал болон бусад асуудлыг хэлэлцэнэ. Энэ тухай Америкийн Ерөнхийлөгч Барак Обамагийн хэвлэлийн нарийн бичгийн дарга Жош Эрнест мэдээлжээ.

“Пак Гын Хэг Цагаан ордонд угтан авахдаа Барак Обама баяртай байх болно. Хоёр орны удирдагчид Зууван танхимд хоёр талын уулзалт хийхээс гадна ажил хэргийн оройн зоог барьж, хэвлэлийн бага хурал хийнэ” гэж Эрнест хэлсэн байна. Өмнөд Солонгосын Ерөнхийлөгч төрийн эрхэнд гарснаасаа хойш Вашингтонд хоёр дахь удаагаа айлчилж байгаа юм.

Пак Гын Хэгийн АНУ-д хийж буй айлчлал өчигдөр эхэлсэн бөгөөд тэрбээр Вашингтон хотын Стратеги, олон улс судлалын төвд зочилсон байна.

Цөмийн хөтөлбөрөөсөө татгалзаж, шинэчлэлийн замаар замнахад Умард Солонгосыг Өмнөд Солонгос болон АНУ хамтдаа ятгах ёстой гэж тэрбээр тус төвд үг хэлэхдээ мэдэгджээ.

“Пхеньяны эрх баригчдад цөмийн хөтөлбөрөөсөө татгалзаж, тусгаарлагдмал байдлаас гарч, шинэчлэл хийж эхлэхэд нь туслах хүчнийг Өмнөд Солонгос-Америкийн эвсэл тэргүүлэн удирдах ёстой” гэж тэрбээр цохон тэмдэглэсэн байна. Олон улсын зуучлалтайгаар өнгөрсөн зун зохих тохиролцоонд хүрсэн Иран улсыг Өмнөд Солонгосын удирдагч жишээгээр татсан байна. Пак мөн Вьетнам, Мьянмар улсын жишгээр ил тод, шинэчлэлийн замаар замнахыг Умард Солонгост уриалсан байна.

Солонгосын хойгийн байдлын тухайд ярихдаа Пак, тус бүс нутаг нь “тив алгасагч баллистик пуужин харвах эсвэл цөмийн зэвсэг турших зэрэг Умард Солонгосын болзошгүй өдөөн хатгалгын улмаас салаа замын уулзварт байгаа болохыг” цохон тэмдэглэжээ.

Д.Жаргал

 

Холбоотой мэдээ