Улаанбаатар
ЗАВХАН: Наймдугаар сард зарим өдөр 30С -ийг давж хална
ОРОН НУТГИЙН МЭДЭЭ | ЗАВХАН
Улиастай, 2024
оны наймдугаар сарын 6 /МОНЦАМЭ/. Завхан аймгийн нийт нутгаар наймдугаар
сард олон жилийн дунджаас дулаан, зарим өдөр 30С -ийг давж халах төлөвтэй
байна.
Дэлхийн цаг уурын байгууллагын тогтоосноор олон жилийн дундаж утга гэдэг нь 1991–2020 оны хоорондох тухайн цаг уурын хэмжигдэхүүний дундаж утгыг авч үздэг.
Цаг агаарын
үзэгдэл нутгийн 30 хувиас хэтрэхгүйгээр зурвас газраар ажиглагдах тохиолдолд
"зарим газраар", 30-70 хувьд "ихэнх нутгаар", 70 хувиас
дээш нутгийг хамрах тохиолдолд "бүх нутгаар" гэсэн нэр томьёо
хэрэглэдэг. Дулааны улиралд агаарт болон хөрсний гадарга дээр температур 0°-аас
бага болж хүйтрэхийг "цочир хүйтрэл" гэнэ.
Энэ сард агаарын дундаж температур нийт нутгаар олон жилийн дунджаас дулаан байна.
Агаарын
температур нэг болон хоёрдугаар арав хоногийн эхэн, гуравдугаар арав хоногийн
сүүлчээр ихэнх нутгаар олон жилийн дунджаас 1–3°С–аар сэрүүн байх бол нэгдүгээр
арав хоногийн дунд болон сүүлч, хоёрдугаар арав хоногийн дунд үеэр ихэнх нутгаар
олон жилийн дунджаас 1–5°С -аар дулаан байх төлөвтэй байна. Ялангуяа нэгдүгээр
арав хоногийн дунд үеэс хоёрдугаар арав хоногийн дунд үе хүртэл ихэнх нутгаар
харьцангуй дулаан буюу зарим үед өдөртөө 30С-ыг давж халах төлөвтэй байна.
Хур тунадас нийт нутгаар олон жилийн дунджийн орчим байх төлөвтэй байна.
Нэгдүгээр арав хоногийн эхэн болон сүүлч, хоёрдугаар арав хоногийн эхэн болон дунд үе, гуравдугаар арав хоногийн эхээр ихэнх нутгаар бороо орно. Зарим газраар дуу цахилгаантай аадар бороо орж, салхи борооны өмнө түр зуур ширүүсэж болзошгүй байна. Иймд томоохон голуудын сав дагуу суурьшиж буй малчид, тариаланчид, аялал зугаалгаар явж байгаа иргэд үер ус, мөндөр, нөөлөг салхины аюулаас сэрэмжтэй байж, тухайн үеийн цаг агаарын нарийвчилсан урьдчилсан мэдээг цаг тухай бүрт нь авч ашиглахыг зөвлөж байна гэж Завхан аймгийн Ус цаг уур орчин шинжилгээний газраас мэдээлэв.
Хур тунадасны мэдээлэл
Агаарын температурын мэдээлэл
Баруун аймгуудын агаарын температур болон хур тунадасны мэдээлэл
