Улаанбаатар
Улаанбаатар-Өндөрхаан чиглэлийн авто замын засварыг ирэх 7 хоногт дуусгана
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Энэ оны төлөвлөгөөт зам засварын ажлын хүрээнд Улаанбаатар-Өндөрхаан чиглэлийн авто замын зорчих хэсэгт яаралтай засах шаардлагатай нүхэн эвдрэл, их засварыг 15 км-т хийж, энэ сарын 10-нд дуусгана.
Мөн, Налайх-Багануур чиглэлийн 34-176 км хүртэлх 142 км хатуу хучилттай авто замын засвар арчлалтыг “Багануур АЗЗА” ТӨХК хариуцан, засварын ажлын 89 хувийг гүйцэтгээд байна. Энэ замд үерийн үед эвдрэл гарах магадлалтай 4 цэг бий. Ойрын өдрүүдэд орсон борооны улмаас тус хэсгийн замд багагүй эвдрэл шинээр үүссэн ч “Багануур АЗЗА” ТӨХК-ийнхан шуурхай засаж, цаг агаарын онцгой нөхцөлд, бэлэн байдалд ажиллаж байна. Харин Улаанбаатар хотоос 226-237км, 260-264км-т нийт 15 км авто замын их засварыг “Харгуй” ТӨХК гүйцэтгэж байна. Тус компани нь Хэнтий аймгаар дамжин өнгөрдөг 5 чиглэлийн 726,1км авто замын засвар арчлалтыг хариуцаж байгаа аж.
ЗТХ-ийн сайд С.Бямбацогт, манай улсын 21 аймаг, 90
гаруй сум Улаанбаатартай хатуу хучилттай авто замаар холбосон ч авто замын
насжилт, даац хэтрүүлэлтээс
үүдэж эвдрэл их гарч байгааг
тэмдэглээд, зам засвараа
чанартай хийхийг аймгуудын замын засвар, арчлалт
хариуцсан АЗЗА ТӨХК -иудад үүрэг
болгосныг ЗТХЯ мэдээлэв.
