Эрээний боомт хаагдсан ч Ханги-Мандалаар төмрийн хүдэр экспортолж байна

Монголын мэдээ | Уул уурхай
192@montsame.mn
2021-10-26 17:57:34

Улаанбаатар /МОНЦАМЭ/.  ЗТХЯ-ны мэдээгээр манай улсын уул уурхайн бүтээгдэхүүний экспортын тээвэр Баянхошуу, Ханги-Мандал, Гашуунсухайт, Шивээхүрэн зэрэг 4 боомтоор явагдаж байна. Коронавирусний халдварын улмаас БНХАУ Эрээний боомтыг хаагаад байгаа ч хоёр талын яриа, уулзалтын дүнд Ханги-Мандал боомтоор 2 улсын хооронд экспорт, импорт хийхийг зөвшөөрөөд байна. Тиймээс манай улс гол;уу төмөр замаар гаргадаг төмрийн хүдрийг дээрх боомтоор автомашинаар тээвэрлэн экспортолж байна.

Он гарснаас хойш энэ сарын 21 хүртэл манай улс 6.12 сая тонн төмрийн хүдэр БНХАУ-д экспортолжээ. Өнгөрсөн сараас эхлэн өдөрт дунджаар 2000 орчим вагон төмрийн хүдрийг Хятадын зах зээлд нийлүүлж байна. Тэгвэл сүүлийн 14 хоногт 200 автомашин төмрийн хүдэр гаргасан талаар УУХҮЯ мэдээллээ.




Нүүрсний тухайд өнгөрсөн 7 хоногт нийт 3046  автомашин, 982 вагоныг гаргаад байна. Үүнийг өмнөх сартай харьцуулахад автомашинаар тээвэрлэсэн нүүрс 11.2, төмөр замынх 77.3 хувиар нэмэгдэж, нүүрсний экспорт 10 дугаар сард өсжээ. Гашуунсухайт боомтоор өдөрт нүүрсний 300-410 автомашин, зэсийн баяжмал ачсан 60-75  автомашин хилээр нэвтэрч байна. Он гарснаас хойш манай улс энэ сарын 21 хүртэлх хугацаанд нийт 1.07 сая тонн зэсийн баяжмал экспортлоод байна.


Нүүрсний экспортын тээвэр 10 дугаар сард 11.2 хувиар нэмэгджээ.


Нүүрсний экспортын тээврийг нэмэгдүүлэх зорилгоор Засгийн газрын энэ оны 185 дугаар тогтоолын дагуу Гашуунсухайт боомтод чингэлэг тээврийн терминал ашиглалтад оруулж, одоогийн явуулж буй тээвэрлэлттэй зэрэгцүүлэн уг терминалаар дамжуулан нүүрсийг чингэлэгт тээвэрлэх бэлтгэл ажлыг хангаж байна.



БНХАУ-ын Эрээний гаалийн бүсэд одоогоор 32 монгол жолооч байрлаж байгаа бөгөөд тэдний дараагийн ээлж болох 70 жолоочийг Замын-Үүдэд тусгаарласан боловч 13 жолоочоос коронавирусний халдвар илэрсэн тул БНХАУ руу нэвтрүүлэх боломжгүй болсон. Иймээс ЗТХЯ Замын-Үүд боомтоор нэвтрэх ачаа тээврийн хөдөлгөөнийг нэмэгдүүлэх зорилгоор хилийн бүсэд чирэгч болон чиргүүлийг солих замаар тээвэрлэлтийг явуулах, мөн хилийн “0” цэгт чингэлгийг автомашинаас автомашинд шилжүүлэн ачих талаар БНХАУ-ын талтай тохирохоор ажиллаж байна. Үүнтэй холбоотой зохион байгуулалтын схем, түр журмын төслийг боловсруулан холбогдох газруудад хүргүүлээд буйг ЗТХЯ-наас мэдээллээ.

Холбоотой мэдээ