ОХУ-ын Ерөнхийлөгчийн Тамгын газрын орлогч дарга Д.С.Песковыг “Алтан гадас” одонгоор шагнав
МОНГОЛЫН МЭДЭЭ | ГХЯ-НЫ МЭДЭЭУлаанбаатар /МОНЦАМЭ/. Монгол Улсаас ОХУ-д суугаа Онц бөгөөд Бүрэн эрхт Элчин сайд Д.Даваа ОХУ-ын Ерөнхийлөгчийн Тамгын газрын орлогч дарга, Хэвлэлийн төлөөлөгч Д.С.Песковыг энэ сарын 8-нд хүлээн авч уулзав.
Энэхүү уулзалтын хүрээнд Монгол, Оросын хооронд дипломат харилцаа тогтоосны 100 жилийн ойг тэмдэглэх хамтарсан төлөвлөгөөнд тусгасан өндөр дээд хэмжээний айлчлалыг хэрэгжүүлэх, Монгол Улсын Ерөнхийлөгчийн ОХУ-д хийхээр төлөвлөж буй айлчлалын талаар санал солилцов. Талууд хоёр орны харилцааны түүхэн жилд Монгол Улсын Ерөнхийлөгчийн анхны гадаад айлчлалыг ОХУ-д хийх нь хоёр орны стратегийн түншлэлийн харилцааг өргөжүүлэн гүнзгийрүүлэх чухал ач холбогдолтой болохыг тэмдэглэв.
Түүнчлэн Монгол Улс, ОХУ-ын хооронд дипломат харилцаа тогтоосны 100 жилийн ойг тохиолдуулан Монгол Улсын Ерөнхийлөгчийн зарлигаар хоёр улсын хоорондын уламжлалт найрамдалт харилцаа, хамтын ажиллагааг өргөжүүлэн хөгжүүлэхэд оруулсан хувь нэмрийг нь үнэлж ОХУ-ын Ерөнхийлөгчийн Тамгын газрын орлогч дарга, Хэвлэлийн төлөөлөгч Д.С.Песковыг “Алтан гадас” одонгоор шагнасныг Элчин сайд Д.Даваа гардуулав.