Арьс, шир боловсруулах үйлдвэр байгуулахад Итали улстай хамтрах сонирхолтой байгаагаа илэрхийлэв

Монголын мэдээ | ГХЯ-ны мэдээ
ariunbold@montsame.mn
2021-06-23 07:27:08

Улаанбаатар /МОНЦАМЭ/. Монгол, Италийн Засгийн газрын холимог комисс (ЗГХХК)-ын III дугаар хуралдаан энэ сарын 22-нд цахимаар боллоо.


Комиссын Монголын хэсгийг Хүнс, хөдөө аж ахуй, хөнгөн үйлдвэрийн сайд З.Мэндсайхан, Италийн хэсгийг Гадаад хэрэг, олон улсын хамтын ажиллагааны дэд сайд Манлио Де Стефано нар даргалав. Хуралдаанаар хоёр талын худалдаа, эдийн засаг, тэр дундаа хөдөө аж ахуй, хөнгөн үйлдвэрийн чиглэлийн хамтын ажиллагааг бэхжүүлэх, соёл, боловсрол, эрчим хүч, зам тээвэр, эрүүл мэнд, барилга, хот байгуулалтын салбарын харилцааг эрчимжүүлэх талаар санал солилцон хуралдааны үр дүнгээр Протокол байгуулж, Хүнс, хөдөө аж ахуй, хөнгөн үйлдвэрийн сайд З.Мэндсайхан гарын үсэг зурлаа.


Монгол Улсын худалдааны чухал түнш, манай ноолуурын экспортын Европ дахь томоохон зах зээлийн нэг Итали Улсын хөдөө аж ахуйн дэвшилтэт технологийг нэвтрүүлж, туршлага судлахад италийн талаас дэмжихээ илэрхийллээ. Мөн хөдөө аж ахуй, хөнгөн үйлдвэрийн салбарын хүний нөөцийг чадавхжуулахад дэмжихээр тохиров.


Монгол Улсын Засгийн газрын арьс, шир боловсруулах цогцолбор үйлдвэр байгуулах төсөлд Итали Улстай хамтран ажиллах, Италийн Санхүүгийн даатгал, бүтээгдэхүүн үйлчилгээний байгууллагаас хөрөнгө оруулалт татах сонирхолтой буйгаа Хүнс, хөдөө аж ахуй, хөнгөн үйлдвэрийн сайд З.Мэндсайхан илэрхийллээ.


Хоёр талын бизнес эрхлэгч хооронд шууд холбоо тогтоох, хамтын ажиллагаанд дэмжлэг үзүүлэх зорилгоор хүнс, хөдөө аж ахуй, хөнгөн үйлдвэр, аялал жуулчлалын чиглэлээр үйл ажиллагаа эрхэлдэг аж ахуйн нэгж хоорондын бизнес форумыг ойрын хугацаанд зохион байгуулахаар тохиролцсон байна.

Холбоотой мэдээ