Улаанбаатар
Олимпын наадам итгэл найдварыг сэргээнэ гэж мэдэгджээ
ДЭЛХИЙН МЭДЭЭ | СПОРТ
ТОКИО. /Japan Today/. Дэлхийн нэгдүгээр дайн болж, Испани
ханиад дэгдсэний дараа Антверпен хотод болсон 1920 оны олимпын наадам хүн
төрөлхтнийг нэгтгэсний адилаар Токиогийн олимпын наадам коронавирусний халдварт
өвчинтэй тэмцэхэд нь хүмүүст итгэл найдвар бэлэглэнэ гэж Токио хотын захирагч Юрико Коикэ
мэдэгджээ.
Дэлхий даяар 3.1 сая хүний амийг авч одсон коронавирусний
цар тахлын улмаас Токиогийн олимпын наадам нэг жилээр хойшлогдсон билээ.
“Хүмүүс хайртай
дотнын хүнээ алдаж зарим нь итгэл найдвараа бүрэн алдаад буй энэ үед олимпын
наадам болох өдрүүд ойртсоор байна. Зуун жилийн өмнө буюу 1920 онд Бельгийн
Антверпен хотод болсон олимпын наадам нь олон сая хүний амийг авч одсон хоёр
том үйл явдлын дараахан болсон юм. Энэ хоёр том үйл явдлын нэг нь Дэлхийн
нэгдүгээр дайн байсан бол нөгөө нь Испани ханиад байсан юм. Антверпений наадам
олон хүнд итгэл найдвар авчирсан. Бид ч мөн Токиогийн олимпын наадмаар
дамжуулан ийм мессежийг илгээж, хүмүүсийн итгэл найдварыг сэргээж, эргэлтийн
цэг нь болно гэж найдаж байна” хэмээн тэрбээр хэлжээ.
“Одоогоор наадамд зөвхөн вакцин хийлгэсэн тамирчдыг оролцуулах
нөхцөл болзлыг тавих боломжгүй. Вакцинжуулалтын аян улс орон бүрт ялгаатай
явагдаж буй. Иймд вакциныг заавал хийлгэх шаардлагатай гэж ятгах боломжгүй.
Харин тамирчдаас тогтмол шинжилгээ авч, эрүүл мэндийг нь дэмжихийг бид хүсэж
байна. Түүнчлэн сүүлийн үед зохион байгуулагдсан олон улсын тэмцээнүүдийн
туршлагаас судалж, олимпын наадмыг аюулгүй орчинд зохион байгуулж чадна гэж
итгэж байна” хэмээн Коикэ мөн ярьсан байна.
