Сансрын нисэгч Владимир Жанибековт баяр хүргэв

Монголын мэдээ | Улс төр
192@montsame.mn
2021-04-13 12:16:21

Улаанбаатар /МОНЦАМЭ/. Монгол Улсаас ОХУ-д суугаа Онц бөгөөд Бүрэн эрхт Элчин сайд Д.Даваа ОХУ-ын хошой баатар, Монгол Улсын баатар, сансрын нисгэгч Владимир Жанибековтой 4 дүгээр сарын 12-ны өдөр утсаар ярьж, Сансарт анх хүн ниссэний 60 жилийн ой, ЗХУ, БНМАУ-ын (Монгол, Оросын) хамтарсан сансрын нислэгийн 40 жилийн ойг тохиолдуулан баяр хүргэв. 

Владимир Жанибеков, 60 жилийн өмнөх Юрий Гагарины домогт нислэг нь хүйтэн дайны нөхцөлд их гүрнүүдийн хүчний тэнцвэрийг тогтоон хадгалахад тухайн үедээ онцгой ач холбогдолтой байсныг дурдаад, 40 жилийн өмнө сансарт хамт ниссэн, нисэхэд цуг бэлтгэж байсан Жүгдэрдэмидийн Гүррагчаа, Майдаржавын Ганзориг нар өнгөрсөн 40 жилийн туршид сансрын нисэгчийн сайхан нэр хүндийг  өндөрт өргөж, Монголын нийгмийн хүлээн зөвшөөрөгдсөн зүтгэлтнүүд болсон төдийгүй андын нөхөрлөлдөө үнэнч үлдсэнд бахархаж явдгаа хэллээ. 

Элчин сайд Д.Даваа, сансрын уудмыг эзэмших үйлсэд Владимир Жанибековын оруулсан хувь нэмэр, Монгол, Оросын хамтарсан нислэгийг мөрөөдлөөс бодит биелэл болгоход гүйцэтгэсэн үүргийг Монголын ард түмэн ямагт өндрөөр үнэлдгийг тэмдэглээд сансрын баатарт урт насалж, эрүүл энх, хамгийн сайн сайхан байхын ерөөл дэвшүүллээ.


Холбоотой мэдээ