ХӨСҮТ-д коронавируст халдвартай 12 гадаадын иргэн эмчлүүлж байна
МОНГОЛЫН МЭДЭЭ | ЭРҮҮЛ МЭНДУлаанбаатар /МОНЦАМЭ/. Монгол Улсад энэ сарын 2-3-нд ХӨСҮТ, ЗӨСҮТ-ийн явуулын авто лаборатори, Сэлэнгэ аймаг дахь салбар лабораторид нийт 613 хүний шинжилгээ хийхэд гурван хүнээс коронавирусний халдвар илэрчээ.
Халдвартай иргэд
10 дугаар сарын 20-нд Энэтхэг-Улаанбаатарын онгоцоор ирсэн
хоёр хүний давтан шинжилгээ, 11
дүгээр сарын 2-нд Алтанбулаг боомтоор орж ирсэн Тир ачааны жолооч аж.
Тухайн хүн 33 настай эрэгтэй, ОХУ-ын иргэн юм.
Ингэснээр Монгол Улсад коронавирусний батлагдсан тохиолдол 352 болжээ. Үүнээс 314 хүн эдгэрчээ. ХӨСҮТ-д одоогоор 38 хүн эмчлүүлж байгаагаас 30 хүний биеийн байдал хөнгөн, 8 нь хүндэвтэр байна. Харин 68 хүн ажиглалт тандалт, эмчилгээнд байгаа аж.
“Сүүлийн үед ачааны машины жолооч нараас коронавирусний халдвар илрэх нь ихсэж байгаа нь бидний анхаарлыг татаж байгаа. ХӨСҮТ-д ачаа тээврийн 16 жолооч эмчлүүлж байгаагаас 12 нь гадаад иргэн байна" гэдгийг ХӨСҮТ-ийн ерөнхий захирал Д.Нямхүү дурдсан юм.