Улаанбаатар
МҮОХ, Монголын телевизүүдийн холбоотой хамтран ажиллана
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монголын үндэсний олимпийн хороо/МҮОХ/-ны Ерөнхийлөгч Н.Түвшинбаяр, Тэргүүн дэд ерөнхийлөгч, Олон улсын олимпийн хороо/ОУОХ/-ны гишүүн Б.Баттүшиг, МҮОХ-ны ерөнхий нарийн бичгийн дарга Э.Бадар-Ууган нар өчигдөр /2020.08.26/ Монголын телевизүүдийн холбоо/МТХ/-ны удирдлагуудыг хүлээн авч уулзав.
Уулзалтад МТХ-ны гүйцэтгэх захирал Т.Ганзул тэргүүтэй NTV, SBN, Mongol HD, UBS телевизийн захирлууд хүрэлцэн ирж, цар тахлын улмаас 1 жилээр хойшлоод буй "Токио-2020" олимпын наадмыг шууд дамжуулах тухай санал бодлоо солилцов.
Тус уулзалтаар МҮОХ болон МТХ-ноос хамтран ажиллах ажлын хэсэг байгуулж, "Токио-2020" олимпын наадмыг угтан спорт-олимпизмийг түгээн дэлгэрүүлэх, олимпын боловсрол, соёл, үнэт зүйлсийг түлхүү сурталчлан таниулах нэвтрүүлгүүдийг бэлтгэн 2021 оны нэгдүгээр сараас эхлэн олон нийтэд хүртээхээр тогтов.
МТХ-нд нийт 16 телевизийн 40 гаруй суваг хамрагддаг бөгөөд энэ нь Монгол улсын нийт хүн амын 90 гаруй хувь нь уг сувгуудыг үзэж байгаа аж.
