Улаанбаатар
АНУ, БНХАУ-ыг БНАСАУ-ын асуудлаар хамтран ажиллах боломжтой гэж үзэж байна
ДЭЛХИЙН МЭДЭЭ | УЛС ТӨР
ВАШИНГТОН. /Yonhap/.
АНУ, БНХАУ олон салбарт өрсөлдөж
байгаа хэдий ч БНАСАУ-ын асуудлыг зохицуулах чиглэлд үргэлжлүүлэн хамтран
ажиллах боломжтой гэж АНУ-ын Төрийн нарийн бичгийн даргын орлогч Стивен Бигун
лхагва гарагт мэдээлжээ.
С.Бигун БНХАУ-ын
талаарх АНУ-ын бодлогын тухай сонсголыг угтан Сенатын танхимын Гадаад харилцааны
хороонд мэдээлэл хийх үеэрээ ийнхүү хэлсэн байна.
“БНАСАУ-ын үй
олноор хөнөөх зэвсэг, баллистик пуужингийн хөтөлбөрүүд нь Солонгосын хойгт энх
тайван, тогтвортой байдлыг цогцлоох бидний стратегийн сонирхлыг сулруулж байна”
гэж БНАСАУ-ын асуудлал хариуцсан АНУ-ын тусгай төлөөлөгчийн албыг давхар хашдаг
С.Бигун хэлжээ. “БНХАУ БНАСАУ-тай холбоотой асуудлыг дипломат шугамаар
зохицуулах хандлагатай санал нийлдэг” гэж тэрбээр нэмж хэлжээ.
БНАСАУ-ын цөмийн
зэвсгийн хөтөлбөрийг татан буулгах чиглэлд гаргаж буй дипломат хүчин чармайлт
нь 2019 оны хоёрдугаар сард Вьетнамд болсон АНУ-ын Ерөнхийлөгч Дональд Трамп, БНАСАУ-ын
удирдагч Ким Жөн Ун нарын дээд хэмжээний уулзалт тохиролцоонд хүрэлгүйгээр
өндөрлөснөөс хойш зогсонги байдалд орсон юм.
БНАСАУ-ын хамгийн
ойрын холбоотон, эдийн засгийн дэмжлэг үзүүлэгч орны хувьд БНХАУ нь Пёньяны
шийдвэрт нөлөөлөх бололцоотой юм байна.
С.Бигуны
хэлснээр, АНУ НҮБ-ын Аюулгүйн Зөвлөлөөс Пёньяны эсрэг авсан хориг арга
хэмжээнүүдийг Бээжингээр илүү сайн дагаж мөрдүүлэхийн тулд БНХАУ-тай
үргэлжлүүлэн холбогдох ажээ.
Гэвч “БНХАУ
БНАСАУ-тай хийж буй худалдаагаа бууруулах чиглэлд хүчин чармайлт гаргаж, Солонгосын
хойгт энх тайван, хөгжил цэцэглэлтийг цогцлоохын тулд АНУ-тай дипломат
хэлэлцээгээ үргэлжлүүлэхийг хөрш орондоо уриалж байгааг би хүлээн зөвшөөрч
байгаа” гэж тэрбээр нэмж хэлжээ.
