Улаанбаатар, 2025 оны наймдугаар сарын 29 /МОНЦАМЭ/. Монгол Улсын Ерөнхийлөгч У.Хүрэлсүхийн санаачилсан “Илгээлт-2100” тэтгэлэгт хөтөлбөрийн болзол ханган МУИС, ШУТИС-д бэлтгэл хөтөлбөртөө амжилттай хамрагдсан оюутнууд гадаадын их, дээд сургуульд суралцахаар өчигдөр эх орноосоо мордлоо.

Энэ жил АНУ, Их Британи, Герман, Франц, Чех, Канад, Польш, Австрали, Япон, Хятад, Солонгос, Турк, Унгар, Литва, Куба гэсэн 15 улсын их, дээд сургуульд  296 оюутан суралцахаар явж байгаа юм. Оюутан залуусыг үдэх ёслолд Монгол Улсын Ерөнхийлөгч У.Хүрэлсүх оролцож, сурлагын өндөр амжилт хүсэн, Төрийн далбаа дурсгалаа. Тэрбээр эрдэм ном, хичээл сургуульдаа шамдан суралцаж, эрдэмтэн багш, эцэг эх, гэр бүл, анд нөхдийнхөө итгэл, сэтгэлийг дааж, бэлтгэл хөтөлбөрөө амжилттай дүүргэн эрдмийн аянд мордож буй залууст чин сэтгэлийн баяр хүргэлээ.

Ерөнхийлөгч хэлэхдээ “Дэлхийн түвшний боловсрол эзэмшиж, олон орны залуустай мөр зэрэгцэн суралцаж, хүсэл тэмүүллээ биелүүлэн, амжилтын буухиагаа ахиулах нь гагцхүү өөрийн зүрх сэтгэл, хичээл зүтгэл, сурлага хөдөлмөрөөс хамаарах болно. Эрдэм боловсролтой, өв тэгш хүмүүжилтэй, эх орноо гэсэн сэтгэлтэй, ажил мэргэжилдээ эзэн болсон ирээдүй хойч үедээ эх орон, ард түмэн, төр, засаг итгэж байна. Эх орныхоо нэр хүнд, монгол хүний үнэ цэнийг өндөрт өргөн, бие биеэ хайрлан хүндэтгэж, нэгэндээ тусалж, дэмжиж явааарай” хэмээн онцоллоо. “Илгээлт-2100” тэтгэлэгт хөтөлбөрийн хүрээнд 758 оюутан дэлхийн 19 орны их сургуульд суралцаж байгаа юм. Монгол Улсын Ерөнхийлөгч У.Хүрэлсүх монгол хүний дэлхийд өрсөлдөх чадварыг нэмэх, хүүхэд, залуусын суралцах тэгш боломжийг хангах, дэлхийн шилдэг их, дээд сургуульд суралцахад дэмжлэг үзүүлэх зорилгоор зарлиг гаргасан. Энэ дагуу жил бүр 330 сум, нийслэлийн хороо тус бүрээс нэг шилдэг сурагчийг шалгаруулж, дэлхийн шилдэг их, дээд сургуульд суралцуулах тэтгэлэгт хөтөлбөрийг 2021 оноос хэрэгжүүлж байна.

Үдэх ёслолын үеэр Ерөнхийлөгчийн зөвлөх Ч.Лодойравсал “Ерөнхийлөгчийн тэтгэлэгт хөтөлбөрийн хүрээнд одоогоор 19 улсад 758 хүүхэд суралцаж байна. Энэ жил 15 орны их, дээд сургуульд 296 хүүхэд явж байна. “Илгээлт-2100” тэтгэлэгт хөтөлбөрийг анх хэрэгжүүлснээс хойш тав дахь жилтэйгээ золгож байна” хэмээсэн бол Боловсролын сайд П.Наранбаяр “Ерөнхийлөгчийн тэтгэлгээр суралцаж буй хүүхдүүд эх орондоо ирээд эзэмшсэн мэргэжлээрээ төрсөн аймаг, сум, дүүрэг, хороондоо ажиллаж үүрэг хүлээж байна. Энэ нь Монгол Улсад боловсон хүчнийг бодлогоор байрлуулах, чадварлаг хүмүүсийг орон нутагт ажиллуулахад түлхэц болж байгаа юм. Мөн нийгмийн олон давхаргын хүүхдүүд гадаадад өндөр боловсрол эзэмшиж, эх орныхоо хөгжилд хувь нэмэр оруулдаг төсөл учраас бид дэмждэг. Дэлхийн 20 орчим оронд суралцаж буй хүүхдүүд төгсөж ирээд соёлын шинэ үр, хөгжлийн шинэ алхмыг бий болгоно гэдэгт итгэлтэй байна. Анх 2021 онд илгээлтээр явж байсан оюутнуудаас энэ жил найм нь сургуулиа төгсөөд ирнэ. Ирэх жилээс зуу, зуугаараа төгсөнө. Анхны хүүхдүүдийн гаргасан зам мөр нь зөв байх ёстой. Тиймээс үүнд онцгой анхаарч байна” гэдгийг дурдлаа. Тэтгэлэгт хөтөлбөрт тэнцсэн оюутнуудын сэтгэгдлээс хүргэе.

Ч.Азжаргал: Монгол Улсын Ерөнхийлөгчийн санаачилсан “Илгээлт-2100” тэтгэлэгт хөтөлбөрт Завхан аймгийн Яруу сумаас шалгарч, тэнцсэндээ баяртай байна. Би Хятадын Тяньжин хотын их сургуульд барилгын инженерээр суралцах юм. Энэ бол миний багаасаа мөрөөдсөн мэргэжил учир маш их баяртай байна. Манай аймгийн барилгын хөгжил муу. Тэр утгаараа аймгийнхаа хөгжил цэцэглэлтэд тусалж, хувь нэмрээ оруулахыг хүсдэг учраас энэ мэргэжлийг сонгосон. Түүнчлэн ирээдүйн Хархорум хотын бүтээн байгуулалтад гар бие оролцохыг чин сэтгэлээсээ хүсэж байна. Ерөнхийлөгчийн тэтгэлэгт шалгарахын төлөө маш их хичээж, ангийнхаа найзаас өөрийгөө тэнцсэнийг мэдсэн юм.

Л.Хишигжаргал: Ховд аймгийн Эрдэнэбүрэн сумаас Ерөнхийлөгчийн тэтгэлэгт хөтөлбөрт тэнцсэндээ маш их баяртай байна. Солонгосын Сөүлийн их сургуульд IT инженерийн чиглэлээр суралцана. Эх орондоо интернэт сүлжээ, кибер аюулгүй байдлыг хангах зорилгоор энэ мэргэжлийг сонгосон. Төрж, өссөн Ховд аймаг болон эх орныхоо хэрэгцээ шаардлагыг хангасан сүлжээ, код бүсчлэлийг хөгжүүлэхэд хувь нэмрээ оруулахыг хүсэж байна.

Б.Мишээл: Ерөнхийлөгчийн тэтгэлэгт хөтөлбөрт тэнцэж, Унгарын Дебрецен хотын их сургуульд компьютерийн ухааны мэргэжлээр суралцах болсондоо баяртай байна. Тэтгэлэгт тэнцсэн хүүхдүүдийн нэрийг өнгөрсөн жилийн аравдугаар сард зарласан. Тэр олон хүүхдийн дундаас өөрийнхөө нэрийг олж харах маш сайхан байлаа. Тухайн мөчийг үгээр илэрхийлэхийн аргагүй юм. Мэргэжлээрээ суралцаад ирснийхээ дараа IT чиглэлээр хувь нэмрээ оруулахыг хүсэж байна. Би эх орондоо хайртай.