Улаанбаатар
Хог, өвс шатааснаас үүдэн гал гарах тохиолдол ихэсчээ
ОРОН НУТГИЙН МЭДЭЭ | ДАРХАН-УУЛ
Дархан-Уул /МОНЦАМЭ/. Хаврын хуурайшилт эхэлсэн энэ өдрүүдэд орчны цэвэрлэгээ хийх, бөөгнүүлсэн хог, өвсөө шатаах тохиолдлууд нэмэгдэж байна. Аймгийн Онцгой байдлын газарт ирж байгаа гал түймрийн дуудлагын дийлэнх хувийг иргэдийн болгоомжгүй байдлаас үүдэлтэй хог шатааж гал алдсан дуудлага эзэлж байна.
Тодруулбал
энэ сарын 22-ны өдөр нийт 5 удаагийн
гал түймрийн дуудлага ирсэн аж. 
Дуудлагын дагуу Гал түймэр унтраах, аврах 22, 54
дүгээр ангийн алба хаагчид түргэн шуурхай ажилласны үр дүнд хүний амь нас
эрсдэлгүй галыг унтраажээ. Гал түймрийн дуудлагын 4 нь иргэдийн буруутай үйлдэл
буюу гэр хорооллын иргэд хашааныхаа өнжмөл шар өвсийг цэвэрлэж, хашаандаа
шатааж байгаад гал алдсан байна.
Тиймээс хаврын хуурайшилт ихтэй улиралд иргэн бүр болгоомжтой байж үнс, нурмаа таглаатай саванд хийж ачуулах, хашаа, хороо, гудамж талбайгаа цэвэрлэхдээ хог, өнжмөл өвс шатаах зэргээр ил задгай гал гаргахгүй байхыг Онцгой байдлын газраас анхааруулж байна. Иргэдийн буруутай үйлдлийн улмаас гал түймэр гарч олон нийтэд хохирол учруулсан тохиолдолд Зөрчлийн тухай хууль тогтоомжийн дагуу торгуулийн шийтгэлийн арга хэмжээ тооцож, гарсан хохирлыг нөхөн төлүүлж, хариуцлага хүлээлгэдэг аж. Тухайн өдөр гал түймэр гаргасан бүх иргэнд хуулийн дагуу хариуцлага хүлээлгэж торгуулийн арга хэмжээ авчээ.
