Шивээ-Овоогийн уурхайд тасралтгүй ажиллагаат ЭКО систем нэвтрүүлэхэд Засгийн газраас баталгаа хүслээ

МОНГОЛЫН МЭДЭЭ
erdenechimeg@montsame.mn
2016-04-01 23:51:55

Өнгөрөгч гуравдугаар сарын 24, 25-нд Дорнод, Сүхбаатар аймагт ажилласан Ерөнхий сайд Ч.Сайханбилэг энэ өдрүүдэд Дорноговь, Говьсүмбэр аймагт ажиллаж байна. Тэрээр дөрөвдүгээр сарын 1-ний энэ өдөр Монгол Улсын  эрчим хүчний нүүрсний хэрэгцээний 30,  “ДЦС-4” -ийн нүүрсний хэрэгцээний 50 хувийг хангадаг Говьсүмбэр аймгийн Шивээ-Овоогийн нүүрсний уурхайн үйл ажиллагаатай танилцлаа.

2016 онд 547 ажилтантай, дундаж цалин 1 сая 200 мянга төгрөг гэж тус компанийн удирдлага танилцууллаа. 

2013 оны Засгийн газрын 100 дугаар тогтоолоор Эрдэнэс Монгол төрийн өмчит хувьцаат компанийн охин компани хэлбэрээр ажиллаж байна. 2013-2015 онд уурхайн техникийн парк шинэчлэлтийг уул уурхайн зориулалт бүхий уулын болон тээврийн техникүүдэд шилжүүлэх ажлыг өөрийн хөрөнгөөр санхүүжүүлж нийт 30,2 тэрбум төгрөгөөр машин техник худалдан авснаар хөрс хуулалтын хэмжээг нэмэгдүүлсэн. 2012 оноос хойш татаас, улсын төсвөөс хөрөнгө оруулалт аваагүй гэлээ.

Гадны байгууллагаар өндөр үнээр хийлгэж байсан өрөмдлөг, тэсэлгээний ажил, цахилгаан хөдөлгүүр, генераторын засвар үйлчилгээг өөрөө хийх, Хатаах үйлдвэрийг жилийн турш тасралтгүй ажиллуулах, өндөр өртөг бүхий тээвэртэй хөрс хуулалтын системийг хамгийн хямд өртөгтэй хөрс хуулах, тээвэрлэх, овоолго үүсгэх цахилгаан тасралтгүй ажиллагаат системд шилжүүлэх зэрэг уурхайн бүтээгдэхүүний өртөг зардлыг бууруулах, бүтээмжийг нэмэгдүүлэх ажлуудыг зохион байгуулж байна. 

Тасралтгүй ажиллагаат систем 2017 онд ашиглалтад орж 2,3 сая метр куб хөрс, 2018-2020 онуудад жилд 4,6 сая метр куб хөрсийг хуулж, тээвэрлэж овоолго үүсгэнэ. Ашиглалтын зардал буурч, олборлолт нэмэгдсэнээр орлого өснө.

Нүүрс косжуулах үйлдвэрийн ТЭЗҮ-г боловсруулан 2018 оноос ашиглалтад оруулж жилд 2 сая тонн нүүрсийг боловсруулж чанарыг сайжруулж коксжуулна. Энэ тохиолдолд борлуулалтыг 2 сая тонноор нэмэгдүүлэх зорилт тавьж ажиллаж байна гэлээ.

Түлшний ханган нийлүүлэгч компаниудад үүссэн өр авлагыг шийдвэрлэж өгөх, тасралтгүй ажиллагаат ЭКО системийг нэвтрүүлэхэд шаардлагатай хөрөнгөд Монгол Улсын Засгийн газрын баталгаа гаргах асуудлыг шийдвэрлэж өгөх хүсэлтийг тус уурхайн удирдлага Ерөнхий сайдад тавилаа. Хүсэлтээ дахин нягтлан боловсруулаад Засгийн газарт танилцуулахыг Ерөнхий сайд үүрэг болголоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Холбоотой мэдээ