Шинээр 40 ил уурхай, гурван баяжуулах үйлдвэр ашиглалтад оржээ

МОНГОЛЫН МЭДЭЭ
ariunzaya@montsame.mn
2015-11-25 15:08:14

 “Ил тод уул уурхай” хэвлэлийн бага хурлаар Уул Уурхайн Сайд Р.Жигжид салбарын  асуудлаар мэдээлэл хийв.

Цацраг идэвхт ашигт малтмал нь тусгай төлбөртэй болно

     Уул уурхайн сайд Р.Жигжид “Цөмийн энергийн тухай хуульд нэмэлт өөрчлөлт оруулах тухай” хуулийн төсөл баталснаар цацраг идэвхт ашигт малтмал нь нөөц ашигласны тусгай төлбөртэй болно. Улмаар тус ордын төрийн эзэмшлийн хувь хэмжээг ашигт малтмалын нөөц ашигласны тусгай төлбөрөөр орлуулах, зах зээлийн үнийн өсөлтөөс хамаарч нөөц ашигласны нэмэгдэл төлбөр авах боломж бүрдэнэ хэмээн мэдэгдлээ. Дээрх хуулийн төслийг  өнгөрсөн сард Засгийн газрын хуралдаанаар хэлэлцүүлж, УИХ-д өргөн мэдүүлэхээр болсон. Хуулийн төслийн гол зорилго нь төр болон цацраг идэвхт ашигт малтмалын тусгай зөвшөөрөл эзэмшигчид хоорондын эрх зүйн харилцааг тодорхой болгож, ирээдүйд үүсэх эрсдлийг бууруулах, татварын эх үүсвэрийг нэмэгдүүлэх нөхцөл бий болгоход чиглэж буй аж.

Уул уурхайн салбарт 5342  ажлын байр нэмэгджээ

     1.2 орчим тэрбум төгрөгийн хөрөнгө оруулалтаар  энэ онд шинээр нийт 56 уурхай болон баяжуулах үйлдвэрийн бүтээн байгуулалт өрнөж буйг салбарынхан дуулгалаа.Одоогийн байдлаар 40 ил уурхай, гурван баяжуулах үйлдвэр ашиглалтад орж Улсын комисс хүлээн авчээ. Ингэснээр 5342 ажлын байр бий болсон байна. 13 уурхай, баяжуулах үйлдвэр санхүүжилт, дэд бүтэц, тоног төхөөрөмжийн угсралтаас шалтгаалан ашиглалтад орж амжаагүй байгаа аж.

Жил бүр  34 сая тонн нүүрс нийлүүлнэ

   Монгол Улс урд хөрштэй хамтран байгаль орчинд нөлөөлөл багатай, дэвшилтэт техник, технологи нэвтрүүлэн томоохон хөрөнгө оруулалт татаж, төсвийн орлогыг нэмэгдүүлэх төсөл хэрэгжүүлэхээр болжээ. Тодруулбал Шивээ-Овоогийн нүүрсний ордыг түшиглэн эрчим хүчний томоохон цогцолбор болгохоор төсөл хэрэгжүүлж эхлээд байна. Манай улс жил бүр  34 сая тонн нүүрс нийлүүлэх аж. Шивээ-Овоогийн нүүрсний орд газарт тусгай зөвшөөрөл эзэмшигч “Эрдэнэс Монгол” ХХК, “Шинэ Шивээ” ХХК-иуд хэлэлцээ хийж тохиролцсноор  хамтарсан  аж ахуйн нэгжийг 2015 онд багтаан байгуулах шийдвэр гаргажээ. Дээрх төслийг хэрэгжүүлснээр Монгол Улсын эрчим хүчний хангамж сайжирч, эрчим хүч экспортлох боломж бүрдэнэ хэмээн мэргэжилтнүүд онцлов.

 45 хоногийн шатахууны нөөцтэй

 Өнөөдрийн байдлаар улсын хэмжээнд дунджаар ердийн хэрэглээний 45 хоногийн газрын тосны бүтээгдэхүүний нөөцтэй байгааг албаныхан хэллээ. Үүнээс А-80 автобензин 57, Аи-92 автобензин 52, дизелийн түлш 30, ТС-1 43 хоногийн нөөцтэй юм байна.

 Б.Заяа

Холбоотой мэдээ