85 настай уулчин дээд амжилт тогтоох гэж байгаад нас баржээ

Дэлхийд | Сонин хачин
dorjkhand@montsame.mn
2017-05-08 09:52:23
КАТМАНДУ. /Kyodo/. Балбын уулчин  “Эверэстэд авирсан хамгийн өндөр настай хүн” гэсэн дээд амжилтыг эвдэх оролдлого хийж байхдаа нас баржээ.

Балбын холбогдох албаны хүмүүсийн мэдэгдсэнээр, 85 настай уулчин Мин Бахадур Шерчан өнгөрсөн бямба гарагийн үдээс хойш далайн түвшнээс дээш 5400 м-ийн өндөрт орших баазад өөд болсон байна.

Түүний үхлийн шалтгаан тодорхойгүй байгаа ч зүрхний шигдээсээр нас барсан байж магадгүй.

2008 онд тэрбээр 76 настайдаа Эверестэд авирсан хамгийн ахмад хүн болж байжээ.

Үүнээс таван жилийн дараа Японы уулчин Юичиро Миүра 80 настайдаа түүний тогтоосон дээд амжилтыг эвдсэн байна.

Шерчан дэлхийн дээд амжилт тогтоох оролдлого хийхэд бэлтгэхээр өнгөрсөн сард дээрх баазад очсон аж.

Тэрбээр Балбын нийслэл Катманду хотоос Эверест рүү явахаасаа өмнө “би оргилд амжилттай гарч чадна гэдэгтээ итгэлтэй байна” гэж хэлж байжээ.
Г.Доржханд



Холбоотой мэдээ