Улаанбаатар
Наймдугаар ангийн охины аминд нь хүрчээ
МОНГОЛЫН МЭДЭЭ | ХУУЛЬУлаанбаатар / МОНЦАМЭ/. Нийслэлийн Баянзүрх дүүргийн 13 дугаар хорооны 15 дугаар хорооллын 6 дугаар байрны орчим хичээлээ тараад гэрийн зүг явж байсан наймдугаар ангийн охиныг машинаараа дайрч амь насанд нь хүрсэн харамсалтай хэрэг өчигдөр орой 20.00 цагийн орчим гарчээ.
“Тоёота Эпсү” загварын автомашины жолооч Б нь согтууруулах ундаа хэтрүүлэн хэрэглэж, биеэ авч явах чадваргүй үедээ жолоо барьснаас энэ ослыг гаргасан байна. Энэ талаар Замын цагдаагийн албаны урьдчилан сэргийлэх, олон нийттэй харилцах хэлтсийн мэргэжилтэн цагдаагийн ахлах дэслэгч Г.Отгонтамир “Согтуугаар тээврийн хэрэгсэл жолоодож байсан Б нь хайс даван далан луу орж явган явж байсан гурван охины нэгийг байшинтай хавсарч мөргөсөн ноцтой хэрэг гарлаа. Дайрсан этгээдийг саатуулсан, одоогоор мөрдөн байцаалтынхаа шатанд явж байна. Сар шинийн өдрүүдээр Замын цагдаагийн алба өндөржүүлсэн бэлэн байдалд ажилласан. Харин иргэд сар шинэ өнгөрөөд цагдаагийн албан хаагчдын хяналт шалгалт суларсан гэж ташаа ойлгож байх шиг байна. Үүнээс болж согтуугаар тээврийн хэрэгсэл жолоодох зөрчил нэлээдгүй гарч байна. Урд шөнийн байдлаар гэхэд согтуугаар тээврийн хэрэгсэл жолоодсон 66 зөрчил илрүүллээ” гэлээ. Маргааш болох Олон улсын эмэгтэйчүүдийн эрхийг хамгаалах өдрөөр согтуугаар жолоо барихгүй байх, явган зорчигчид анхаарал болгоомжтой зорчихыг Замын цагдаагийн албанаас анхааруулж байна.
Ж.Батсайхан
